Са Зьмітром Жалезьнічэнкам афіцэры ў войску размаўляюць па-беларуску
Намесьнік старшыні Партыі БНФ Аляксей Янукевіч і сакратар Управы Партыі БНФ Уладзімер Лабковіч наведалі вайсковую частку ў Жлобіне, куды накіраваны для праходжаньня вайсковай службы моладзевы актывіст Партыі БНФ, адлічаны студэнт-выдатнік Гомельскага дзяржаўнага ўнівэрсытэту Зьміцер Жалезьнічэнка. Прадстаўнікі кіраўніцтва Партыі перадалі Зьмітру словы падтрымкі, а таксама даведаліся зь першых вуснаў акалічнасьці ганебнага затрыманьня Зьмітра 24 студзеня, напярэдадні яго адпраўкі ў войска.
"Нягледзячы на тое, што Зьміцер зараз трымае галадоўку, ён знаходзіцца ў цьвёрдым маральным стане, баявым настроі - кажа Аляксей Янукевіч. - Ён рашуча настроены і далей змагацца за аднаўленьне ва ўнівэрсытэце. Таксама Зьміцер змагаецца за тое, каб загады ў войску для яго аддаваліся па-беларуску. Сказаў, што ставяцца да яго добра, з павагаю. Афіцэры размаўляюць са Зьмітром па-беларуску".
Аляксей Янукевіч і Ўладзімер Лабковіч заклікалі Зьмітра Жалезьнічэнку спыніць галадоўку.
Уладзімер Лабковіч тым часам рыхтуе ліст ад імя кіраўніцтва Партыі БНФ да міністра абароны Беларусі з просьбай прадаставіць адтэрміноўку Зьмітру Жалезьнічэнку ў праходжаньні вайсковай службы да канчатковага вырашэньня пытаньня зь яго адлічэньнем з унівэрсытэту.
