Пад Гомелем з’явіўся памятны знак “Пакутнікам тваім, Беларусь”
https://spring96.org/be/news/18890
2007
2007-10-29T10:53:41+0200
2007-10-29T10:53:41+0200
1970-01-01T03:00:00+0300
be
Пад Гомелем з’явіўся памятны знак “Пакутнікам тваім, Беларусь”. Яго ўсталявалі мясцовыя актывісты дэмакратычных партый і грамадскіх арганізацый у месцах масавых расстрэлаў часоў сталінскіх рэпрэсій.
Нагадаем, масавыя пахаванні расстраляных людзей ва ўрочышчах Тры Слупы і Боркі былі выяўленыя сёлета пашукавікамі Міністэрства абароны. Улады заявілі, што экспертыза не здолела выявіць, ці гэта сапраўды ахвяры НКВД.
Тым часам дэмакратычныя актывісты знайшлі сведкаў-мясцовых жыхароў, якія пацвердзілі, што ў тых лясах людзей стралялі менавіта энкавэдысты.
Акрамя таго, дзеці рэпрэсаваных, якія ў пачатку 90-х знаёміліся ў архівах КДБ са справамі сваіх бацькоў, сведчаць: там расстраляныя чэкістамі жыхары вёсак Кантакузаўка і Краснае.
Гомельскі гарвыканкам не даў дазволу на акцыю, але яна ўсё ж была праведзеная пад пільным наглядам праваахоўных органаў.
На мерапрыемстве прысутнічала каля 50 чалавек. Яно пачалося на 9-м кіламетры шашы Гомель – Чарнігаў, дзе яшчэ ў 1994 годзе быў усталяваны крыж у памяць ахвяраў палітычных рэпрэсій.
