Моладзевыя актывісты Яраслаў Грышчэня і Віктар Парначоў знаходзяцца ў баранавіцкім сьледчым ізалятары.

Увечары 13 кастрычніка Яраслаў Грышчэня пасьпеў паведаміць “Свабодзе”, што невядомыя намагаюцца зламаць дзьверы кватэры, якую маладафронтаўцы арандавалі на месяц. Яраслаў з Віктарам адмыслова прыехалі ў Менск, каб узяць удзел у апейскім маршы “За Свабоду”.

Міліцыянты затрымалі хлопцаў і адвезьлі ў Баранавічы. Там іх зьмясьцілі ў сьледчы ізалятар.

Паплечнікі Яраслава Грышчэні і Віктара Парначова лічаць, што супраць хлопцаў могуць распачаць крымінальную справу за графіці. Напярэдадні суду над Яраславам, які адбыўся 10 верасьня, у Баранавічах на будынку суду з’явіліся надпісы палітычнага зьместу, сярод якіх: “Свабоду палітвязьням”.

Падазраваным у крымінальнай справе тады прызналі толькі Віктара Парначова.