Прысуд па справе сябры ініцыятыўнай групы Ціханоўскай з Мазыра: 5 год калоніі ўзмоцненага рэжыму Дапоўнена
Прысуд Руслану Парфенаву. Фота: Палеская вясна.
У судзе Мазырскага раёна 3 сакавіка вынесены прысуд па крымінальнай справе палітзняволенага Руслана Парфёнава. Яму прад’яўленае абвінавачванне па ч. 2 арт. 293 (Удзел у масавых беспарадках).
Справу разглядаў суддзя Анатоль Стрэльчанка.
Сябра ініцыятыўнай групы Ціханоўскай з Мазыра, Руслан Парфёнаў быў затрыманы 6 жніўня, а назаўтра адміністрацыйна арыштаваны на 10 сутак. Пасля адбыцця пакарання быў затрыманы ізноў, у межах крымінальнай справы. Пераведзены ў Мінскі СІЗА-1. Прызнаны палітычным зняволеным.
- У чаканні прысуду над Русланам Парфёнавым. Фота: Палеская Вясна
17 жніўня Руслан Парфёнаў выйшаў з ІЧУ, адбыўшы адміністрацыйнае пакаранне, а 19 жніўня яго затрымалі зноў. З таго часу ён утрымліваўся ў Мінску ў ізалятары № 1 на вуліцы Валадарскага.
На тэлеканале ОНТ паказалі сфальсіфікаваны сюжэт, у якім Руслана Парфёнава з Мазыра абвінавацілі нібыта ў вырабе нейкіх «вожыкаў» для спынення транспарту. Пры гэтым у ролі Парфёнава паказалі зусім іншага чалавека, нават вонкава не падобнага на сапраўднага Руслана.
- Суд над Русланам Парфёнавым. Фота: Палеская Вясна.
Суд над палітзняволеным Русланам Парфёнавым праходзіў у закрытым рэжыме.
17 лютага на працэсе адбыліся судовыя спрэчкі, пракурор запрасіў для Руслана 6 гадоў пазбаўлення волі ў калоніі.
На 3 сакавіка на 10 гадзінаў было прызначана абвяшчэнне прысуду. Але а 10-й гадзіне на паседжанне нікога не пускалі, хаця каля залы суда сабралася некалькі дзясяткаў чалавек. Пазней высветлілася, што ў гэты час Руслан Парфёнаў гаварыў апошняе слова, паведамляе "Палеская Вясна".
Сёння вынесены прысуд - пяць год пазбаўлення волі ў калоніі ўзмоцненага рэжыму.
Металічныя вырабы ў форме "вожыкаў" суд пастанавіў знішчыць.
