Праваабарончая праграма "Вясна" на Беларускім Радыё Рацыя
Кожны аўторак у 21:05 (паўтор у суботу ў 8:05) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Прэм'ера анлайн — на сайце па любых са спасылак тут, альбо тут.
Анонс праграмы на 30 чэрвеня:
Хроніка: рэпрэсіўныя суды працягваюцца, а пратаколы пры гэтым складаюцца з памылкамі. Судзяць за тое, што паставіў подпіс на пікеце ці правяла стрым з ланцугу салідарнасці.
Каментар: апошнім часам частка судовых пасяджэнняў стала праводзіцца праз Skype-відэасувязь. У якасці прычыны такога новаўвядзення называеццаа небяспека пандэміі. Аляксандр Грэчышнікаў, якога судзілі такім чынам, зазначыў, што чуваць было вельмі дрэнна — выратавала сітуацыю толькі тое, што адзін з міліцыянтаў “па дабраце душэўнай” падключыў свой уласны тэлефон да відэасувязі. Якім чынам фармат анлайн-судоў парушае правы чалавека, прааналізуе праваабаронца “Вясны” Алег Пашкевіч.
Час выбараў: 24 чэрвеня завяршылася фарміраванне Участковых выбарчых камісій, а кампанія “Праваабаронцы за свабодныя выбары” назірае пэўную дыскрымінацыю: ад апазіцыйных партый у склад камісій змог трапіць толькі 1,1% вылучаных, а ад праўрадавых — 96,7 %.
Асоба: мінчук Віктар Класінскі 19 чэрвеня, у пятніцу, прайшоўся з бел-чырвона-белым сцягам па горадзе. А да хаты змог трапіць толькі ў панядзелак. Ён бачыў, як у аўтазаку збівалі сталых мужчын, сядзеў у ЦІП з такімі ж выпадковымі людзьмі, як і ён (напрыклад, з юнаком, які проста чакаў тралейбус) і ўвесь час не ляжаў на “лежаку”— бо за гэта пагражалі выліць вядро хлоркі.
У музычных паўзах — гурт “Дядя Ваня”, выступ якога нядаўна скасавалі у Гомелі “праз адсутнасць фінансавых сродкаў”. Напярэдадні гэтага спявак гурта Іван Вабішчэвіч у сацыяльных сетках падтрымаў пратэсты на вуліцах беларускіх гарадоў.
