Колькі каштуе хвіліна мірнага сходу ў Беларусі? Дапоўнена
Акцыя 2 красавіка. Фота: ПЦ "Вясна"
Вечарам трэцяга красавіка Суд Маскоўскага раёна г. Мінска аштрафаваў актывіста Алеся Таўстыка на 15 базавых велічыняў (367,75 рублёў) за ўдзел у несанкцыянаваным масавым мерапрыемстве па ч.3 арт. 23.34 КаАП Рэспублікі Беларусь. Яго затрымалі каля 14.00 ля пад’езда свайго дома і даставілі ў РУУС Маскоўскага раёна. Вечарам над ім адбыўся суд.
Суды над затрыманымі Вячаславам Касінеравым і Пятром Маркелавым адбыліся ў судзе Маскоўскага раёна 4 красавіка. Ноч яны правялі ў ізалятары.
Справы разглядаюць суддзі Таццяна Мотыль і Віктар Козак. Былі аб'яўлены перапынкі для азнакамлення са справай Пятром Маркелавым, і прыбыццём адваката Вячаслава Касінерава.
Праваабаронцам стала вядома, што суд аштрафаваў актывістаў Пятра Маркелава і Вячаслава Касінерава на 25 базавых велічыняў кожнага (па 612,5 рублёў).
Такім чынам, агульная сума штрафаў за хвіліну правядзенння мірнага сходу на Плошчы Незалежнасці складае 65 базавых велічыняў, альбо 660 еўра.
2 красавіка на плошчы Незалежнасці адбыўся пікет за дэкрыміналізацыю марыхуаны і іншых кантраляваных рэчываў. Актывісты прымеркавалі пікет да пачатку вясновай сэсіі Палаты прадстаўнікоў і накіравалі туды зварот, дзе нагадалі пра запатрабаванасць рэформы артыкула 328 Крымінальнага кодэксу.
Пікет працягваўся некалькі хвілінаў, на працягу якіх актывісты зрабілі фотаздымак з картачкамі "Дэкрыміналізацыя 328" насупраць Дома ўрада, і разышліся. Падчас акцыі ніхто затрыманы не быў, усе затрыманні адбыліся на наступны дзень 3 красавіка.
