Дзень правоў чалавека адзначылі ў Магілёве двума мерапрыемствамі
9 снежня «Праўныя дарэктары» зладзілі семінар-лекцыю, а 10 снежня магілёўскае аддзяленне праваабарончага цэнтру «Вясна» арганізавала кінапрагляд, прысвечаны знакамітаму дысідэнту Міхасю Кукабаку.
Ініцыятыва «Праўныя дарэктары» адзначыла Дзень правоў чалавека вялікім семінарам 9 снежня. Валдзіс Фугаш распавёў прысутным, што ўяўляе сабой Дэкларацыя, навошта яна была прынята, а таксама яе значэнне для грамадства.
На наступны дзень, 10 снежня, грамадскі цэнтр “Кола” прыняў яшчэ адзно мерапрыемства да памятнага дня.
- «Спускаючыся да чыгуначнага пераезду, што на вуліцы Бахарава, заўважыў папераджальны надпіс ля шлагбаўма: «Берегись поезда!» І адразу ўзгадалася.Бо ж 25 гадоў таму тут было напісана: «Сцеражыся цягнiка!» І толькі ўнізе — рускі пераклад. Цяпер беларускі выраз знік. Да ўласнага здзіўлення, мяне гэта непрыемна закранула. Нечакана я ўсвядоміў сябе беларусам. Бо тут спакон веку жылі мае дзяды і прадзеды. Сама зямля гэтая складаецца з праху незлічоных пакаленняў маіх суродзічаў. І я, іх нашчадак, маю бясспрэчнае права не толькі на гэтую зямлю, але і на сваю родную мову, на права быць беларусам...».
З гэтых слоў пачалася сустрэча 10 снежня. Яны належаць знакамітаму беларускаму дысідэнту Міхасю Кукабаке – чалавеку, які каля сямнаццаці год правёў у вар’ятнях ды турмах за свае антысавецкія погляды. Вёў мерапрыемства праваабаронца Аляксей Колчын, які распавёў пра жыцце былога палітвязня, яго канфлікты з савецкай дзяржавай, а таксама пра пакаранні, якімі намагаліся зламіць волю Кукабакі.
-Сёння мы палічылі патрэбным расказаць пра чалавека, які шмат зрабіў для правоў чалавека. У 1968 годзе ён выказаў нязгоду з акупацыяй савецкімі войскамі Прагі. У Дарніцкім ваенкамаце Кіева ён сказаў,«калі накіруеце ў Чэхаславаччыну, павярну аўтамат супраць вас: саўдзельнікам злачынства савецкага ўраду ня буду, выступлю на баку чэхаславацкага народу», - распавёў Колчын.
Перад праглядам прысутным раздалі кішэнныя асобнікі Дэкларацыі правоў чалавека.
- За гэта ж самае Кукабаку змясці ў спецлякарню для псіхічнахворых. Толькі за тое, што чалавек распаўсюджваў інфармацыю пра правы чалавека, - падкрэсліў Колчын.
Кароткаметражны фільм «Дысідэнт» раскрывае асаблівасці лёсу і характару Міхася Кукабакі: як можа адзін чалавек супрацьстаяць таталітарнай сістэме СССР, як не зламацца ў невыносных умовах савецкіх турмаў, як перамагчы страх, захаваць годнасць, не страціць перакананні. Быў зняты па ініцыятыве ПЦ “Вясна”.
