Сёння Барысу Звозскаву споўнілася б 65 год

Барыс Звозскаў нарадзіўся 26 лютага 1949 года ў Белогорску (Расія). Скончыў Ленінградскі электратэхнічны інстытут па спецыяльнасці «інжынер», Вышэйшыя міжнародныя курсы па абароне правоў чалавека.

З 1990-х гадоў Звозскаў пачаў актыўна займацца праваабарончай дзейнасцю, практычнай абаронай у палітычна матываваных судовых працэсах, прымаў удзел у экспертызе шэрагу законапраектаў. З 1998 года займаўся прававым асвятленнем у кірунку прэвентыўнай праваабароны.

Праваабаронца вельмі шмат працаваў з журналістамі і грамадзянскімі актывістамі па пытаннях абароны ў адміністрацыйных і крымінальных працэсах. Унёс вялікі ўклад у асвятленне і адукацыю па пытанні правоў чалавека сярод моладзі, юрыстаў, журналістаў і праваабаронцаў. У 2008 годзе стаў лаўрэатам прэміі "Праваабаронца года - 2008".

З самага пачатку Барыс Звозскаў быў сярод ініцыятараў і актыўных удзельнікаў працэсу стварэння і затым развіцця Беларускага дома правоў чалавека, з 2007 па 2010 быў прэзідэнтам ДПЧ. 31 ліпеня 2013 года была афіцыйна зацверджана новая назва беларускага ДПЧ у Вільні – Беларускі дом правоў чалавека імя Барыса Звозскава. 

Праваабаронца пайшоў з жыцця ў чэрвені 2012 года пасля цяжкай і працяглай хваробы.