27 красавіка ў Брусэлі адбудзецца інфармацыйны вечар, прысвечаны гадавіне Чарнобыльскай катастрофы

Арганізатары імпрэзы - Офіс за дэмакратычную Беларусь (Брусэль) і Hanse-Office (Аб’яднанае прадстаўніцтва Гамбурга і федэральнай зямлі Шлезвіг-Гольштайн у Еўрасаюзе).

Вечар распачнецца ў 19 гадзінаў з гутаркі, падчас якой будуць абмеркаваныя Чарнобыльскія праблемы, у тым ліку іх палітычны кантэкст у сучаснай Беларусі. У прыватнасьці, плануецца зладзіць слайд-шоў па выніках Чарнобыльскага шляху-2007.

Пасля гутаркі наведнікам будуць прадэманстраваныя дакументальныя фільмы “Жылі-былі” і “Завядзёнка” беларускага рэжысёра Галіны Адамовіч. “Жылі-былі” – фільм, які па-мастацку спрабуе асэнсаваць маштаб Чарнобыльскай бяды, “Завядзёнка” – кіназамалёўка пра жыцьцё беларускага Палесься.