У Менску збіраюць подпісы за адстаўку старшыні Менгарвыканкама

Жыхары гістарычнага цэнтра Менска патрабуюць адстаўкі старшыні гарвыканкаму беларускай сталіцы Мікалая Ладуцькі. Збор подпісаў пад адпаведным зваротам да Аляксандра Лукашэнкі распачаты ў сувязі з планамі гарадскіх уладаў па рэканструкцыі старога Менска.

Калі новы праект рэканструкцыі будзе рэалізаваны, непакояцца менчукі, то яны страцяць сваё жыллё ў цэнтры сталіцы. Кажа жыхар дома №24 па вуліцы Рэвалюцыйнай Аляксандр Каржанеўскі.

- Прапануем забараніць знішчэнне аб’ектаў гісторыка-культурнай спадчыны; забараніць выгнанне жыхароў сталіцы з гістарычнага цэнтра і прасіць прэзідэнта вызваліць старшыню Менгарвыканкама і кіраўніка адміністрацыі Цэнтральнага раёна ад займаемых пасадаў; аднавіць законнасць і канстытуцыйнасць у гістарычным цэнтры – гэта наш зварот, патрэбаванні, прапановы.

Міхаіл Жых, галоўны інжынер “Менскай спадчыны”, якая замовіла праект па рэканструкцыі гістарычнага цэнтра Менска, запэўнівае жыхароў, што высяляць іх ніхто не збіраецца.

- Зыходзячы з вынікаў першага абмеркавання, у гэты праект аўтар ужо ўнёс змены: там ніякага зносу няма. Ніводны з жылых дамоў не падлягае зносу.

Людзі не вераць абяцанням чыноўнікаў. Яны намераныя змагацца за сваю маёмасць да канца. Грамадскія абмеркаванні праекта рэканструкцыі старога Менска працягнуцца да канца студзеня.