Міколу Уласевічу не далі выступіць на эканамічным форуме

Кандыдату ў дэпутаты, грамадскаму актывісту з Астравеччыны Міколу Уласевічу не далі выступіць на эканамічным форуме “Паўночны вектар Гарадзеншчыны 2012”, які адбыўся у Астраўцы 8 верасня. Згодна з правіламі, за дзень да форуму Уласевіч падаў адпаведную заяўку ў аргкамітэт. У ёй ён пазначыў, што з’яўляецца кандыдатам у дэпутаты менавіта па тым рэгіёне, пра перспектывы і шляхі развіцця якога павінна была ісці гаворка на мерапрыемстве. У час форуму калега Уласевіча, таксама кандыдат у дэпутаты Іван Крук, дадаткова прасіў даць Уласевічу слова на канферэнцыі. Аднак Крука спынілі два міліцыянты. Пасля гэтага Мікола Уласевіч і Іван Крук пакінулі залу.

Мікола Уласевіч лічыць, што дадзены форум быў задуманы выключна як чарговая піяр-акцыя ў кантэксце пабудовы пад Варнянамі атамнай станцыі. Насамрэч ніякага грамадскага абмеркавання на такіх канферэнцыях няма, а значыць важнейшыя пытанні развіцця рэгіёну вырашаюцца без удзелу мясцовых жыхароў. У сваім выступе Уласевіч хацеў прадставіць альтэрнатыўныя прапановы па лакальным развіцці, аднак зрабіць гэта яму не далі.