Улады Мазыра вызначылі месца для правядзеньня масавых мерапрыемстваў ва ўрон спартоўцам
Уладзімір Целяпун на стадыёне Спартак
Кіраўніцтва Мазырскага райвыканкама сваім рашэньнем вызначыла мясцовы стадыён “Спартак” адзіным месцам для правядзеньня масавых мерапрыемстваў у горадзе, у тым ліку мітынгаў і пікетаў.
Аднак, з інфармацыі аб раскладзе заняткаў на стадыёне “Спартак”, прадастаўленай праваабаронцу Уладзіміру Целяпуну дырэктарам СДЮШАР №1 г. Мазыра С. Кавалевічам, вынікае, што гэтае месца практычна не можа выкарыстоўвацца для масавых мерапрыемстваў, паколькі цалкам занятае трэніроўкамі юнакоў, ветэранаў, работнікаў НПЗ, Гомельчыгундартранс, спаборніцтвамі чэмпіянату вобласці і рэспублікі сярод юнакоў.
“Незразумела, навошта было Мазырскаму райвыканкаму прызначаць стадыён для масавых мерапрыемстваў, калі ён так запатрабаваны спартовым грамадствам горада і раёна? Няўжо у Мазыры няма вольных пляцовак, дзе б грамадска-актыўныя грамадзяне маглі публічна выказаць сваё меркаванне не замінаючы іншым?” - ставіць пытаньне праваабаронца.
У якасьці альтэрнатыўных вырыянтаў Уладзімір Целяпун прапаноўвае гарадскім уладам больш зручныя і прасторныя месцы: плошча Леніна і да ракі Прыпяць, за скульптурным комплексам-фантанам “Купалінка”, пляцоўку каля ДК “МНПЗ”, пляцоўку каля фантана, што побач са стадыёнам “Юнацтва”.
