Валянцін Стэфановіч: “Закон аб амністыі палітызаваны самімі ўладамі”

Намеснік старшыні праваабарончага цэнтра “Вясна” пракаментаваў, чаму не выпадае чакаць вызвалення палітвязняў паводле прынятага закона аб амністыі і адзначыў, што ўлады штучна ўжылі палітызацыю супраць апанетаў рэжыма, якія знаходзяцца за кратамі.

9 ліпеня Лукашэнка падпісаў закон “Аб амністыі некаторых катэгорый асобаў, якія здзейснілі злачынства”.  Учора дакумент быў зарэгістраваны ў Нацыянальным рэестры прававых актаў. А сёння будзе афіцыйна апублікаваны.

Ніякіх зменаў у параўнанні з законапраектам, які ўжо прыняў парламент, не адбылося. Такім чынам, у дакуменце засталіся выключэнні, на якіх амністыя не распаўсюджваецца. Сярод іх асуджаныя за злачынствы, прадугледжаныя артыкуламi 293 (масавыя беспарадкі), 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх), 367 (паклёп у дачыненні да прэзідэнта), 369-3 (парушэнне парадку арганізацыі або правядзення масавых мерапрыемстваў). Таксама амністыя не будзе распаўсюджвацца на злосных парушальнікаў рэжыма, а такі статус маюць фактычна ўсе палітвязні.

Напярэдадні прыняцця закона, улады падкрэслівалі, што ніякай палітызацыі для адмысловага вызвалення палітвязняў не будзе. “Але па выніку штучная палітызацыі адбылася акурат з боку ўладаў, - лічыць Валянцін Стэфановіч. – Чамусьці больш цяжкія злачынствы патрапілі пад амністыю, сярод  якіх, напрыклад, распаўсюд наркотыкаў. Складваецца ўражанне, што закон сфармуляваны адмыслова так, каб ніводны палітвязень не быў вызвалены з дапамогай гэтага прававога механізма. Калі правесці параўнанне з законамі аб амністыі папярэдніх гадоў, то ў пералік артыкулаў, на якія не распаўсюджваецца амністыя, ніколі не ўключаліся  артыкулы 342 і 367”.