Гародня: суд Ленінскага раёна ідзе звыклым шляхам
30 чэрвеня суд Ленінскага раёна Гародні разгледзеў скаргу Аляксандры Васілевіч, старшыні гарадзенскай гарадской арганізацыі партыі АГП. Скарга была пададзеная на адмову гарвыканкама ў правядзенні пікету пад дэвізам “Сумленныя выбары без Лукашэнкі”. Суд не захацеў прыняць да ўвагі аргументы Васілевіч і пацвердзіў правільнасць адмовы. Рашэнне прыняла суддзя Людміла Жукоўская.
Гэта ўжо чацвёрты аналагічны адказ гарадзенскага суду на скаргі актывістаў АГП па такіх пікетах. Па сутнасці рашэнні гарвыканкаму прымаюцца “пад капірку”, а суд не хоча ўлічваць усе акалічнасці сітуацыі. Ва ўсіх выпадках суд не ўлічвае таго, што Канстытуцыя Рэспублікі Беларусь і міжнародныя дамовы стаяць вышэй за мясцовыя нарматыўна-прававыя акты. Само ж рашэнне Гарадзенскага гарвыканкаму №540, якое вызначае месцы правядзення масавых мерапрыемстваў у горадзе, відавочна супярэчыць вышэйшаму заканадаўству.
У гэтым працэсе гарвыканкам таксама ўказаў, што ў чыноўнікаў былі сумневы наконт таго, што заяўнік зможа аплаціць выдаткі на правядзенне пікету.
На рашэнні судоў па правядзенні пікетаў сябрамі АГП ужо пададзены тры касацыйныя скаргі.
"Праваабаронцы за свабодныя выбары"
