У Гародні будуць пікетаваць “За справядлівыя выбары без Лукашэнкі”

Пяцёра грамадска-палітычных актывістаў Гародні, пераважна сябраў Аб’яднанай грамадзянскай партыі, падалі ў гарвыканкам заяўкі на правядзенне ў горадзе над Нёманам 15 траўня пікетаў пад лозунгам “За справядлівыя выбары без Лукашэнкі”. У заявах пазначаны розныя месцы гораду. Адна з заяўніц пікету – Аляксандра Васілевіч, старшыня гарадской арганізацыі АГП, кажа, што яны не маюць асаблівых ілюзій наконт рашэння гарвыканкаму, паколькі мясцовыя “вертыкальшчыкі” ужо даўно не дазваляюць грамадска-палітычным актывістам правядзенне акцый. Аляксандра кажа, што на сваю апошнюю заяўку на пікет, прымеркаваны ўгодкам чарнобыльскай трагедыі, яна ўвогуле не атрымала з гарвыканкаму пісьмовага рашэння, даведаўшыся пра адмову толькі ад міліцыі.