Невядомыя ўзламалі электронную скрынку рагачоўскага актывіста і рассылаюць ад яго імя палітычны спам

27 красавіка на электронныя скрынкі гомельскіх апазіцыянераў, праваабаронцаў і журналістаў прыйшоў ліст ад нібыта рагачоўскага грамадскага актывіста Дзяніса Дашкевіча. У лісце быў чарговы паклёп на гомельскіх апазіцыянераў, са звыклымі папрокамі ў тым, што, маўляў, яны нідзе не працуюць, а жывуць за замежныя грошы.

«Маю скрынку ўзламалі, відаць, тады ж, калі і наш сайт vrogacheve.ru. Каб узломшчыкі былі простыя хуліганы, то натуральна, што палітычныя артыкулы яны не рассылалі б. Гэта брудная правакацыя беларускіх спецслужбаў», - пракаментаваў Дзяніс Дашкевіч.

17 красавіка быў узламаны невядомымі незалежны сайт навінаў vrogacheve.ru. Пасля ўзлому на сайце таксама з'явіліся паклёпніцкія матэрыялы на адрас гомельскай апазіцыі, і таксама нібыта ад імя Дзяніса Дашкевіча.