Міністэрства аховы здароўя не каментуе прапанову Тозіка
Зварот барысаўскага праваабаронцы Алега Мацкевіча з просьбай даць ацэнку прапанове віцэ-прэм'ера Анатоля Тозіка з нагоды платнага наведвання паліклінік «завіс» ў Міністэрстве аховы здароўя.
Пасля заявы віцэ-прэм'ера Анатоля Тозіка аб тым, што наведванне паліклінік трэба зрабіць платным, барысаўскі праваабаронца Алег Мацкевіч у пачатку сакавіка адправіў у Саўмін зварот, разам з якім пераслаў і Канстытуцыю РБ. Праз некалькі дзён з Саўміна праваабаронца атрымаў адказ, у якім гаварылася, што яго зварот пераслалі на разгляд у Міністэрства аховы здароўя. Гэта было 9 сакавіка. Да гэтага часу адказу з Міністэрства аховы здароўя няма.
“Шчыра кажучы, я і не спадзяваўся на які-небудзь зразумелы адказ, - кажа Мацкевіч. - Тым не менш, вельмі хочацца даведацца пра тое, што ж думаюць наконт прапановы Тозіка нашы чыноўнікі”. Таму праваабаронца адаслаў ліст у Міністэрства аховы здароўя з просьбай усё ж разгледзець яго зварот. “Прашу Вас разгледзець мой зварот і выказацца наконт магчымасці рэалізацыі прапановы А. Тозіка аб платным наведванні паліклінік, а таксама яго законнасці з пункту гледжання наяўнасці сацыяльных гарантый, замацаваных у Канстытуцыі Рэспублікі Беларусь”, - гаворыцца ў лісце.
