Алесь Бяляцкі: "Малайцы! Трэба варушыцца, бо пад ляжачы камень вада не цячэ"

Бабруйскія грамадскія актывісткі атрымалі паштоўку ад Алеся Бяляцкага, дасланую з Бабруйскай выпраўленчай калоніі. Праваабаронца падзякуе жанчынам за падтрымку і выказвае спадзяванне на хуткую сустрэчу.

“Я вельмі ўзрадавалася, калі мы з Валянцінай Глухавай атрымалі і прачыталі адказ Алеся Бяляцкага на наш ліст ад, - распавядае Вольга Піманава. – Ён вельмі добры, аптымістычны, адчуваецца, што Алесь не зламаны і гатовы годна пераносіць усе цяжкасці”.

У прыватнасці, у паштоўцы Алесь Бяляцкі піша: “Пакуль што дапамога мне не патрабуецца. Я здаровы і не галадаю. Настрой таксама нармальны. Чытаў у “Нашым слове”, што Вы праводзілі агульнанацыянальную дыктоўку ў Бабруйску. Малайцы! Трэба варушыцца, бо пад ляжачы камень вада не цячэ. Я таксама спадзяюся, што ў Бабруйску мы яшчэ сустрэнемся і пагаворым, і пап’ём гарбаты. Перадавайце прывітанне ўсім знаёмым і неабыякавым”.

Вольга Піманава кажа, што бабруйскія дэмакратычныя актывісты гатовы аказаць Алесю Бяляцкаму неабходную дапамогу, калі гэта спатрэбіцца. Пакуль жа яны будуць весці перапіску з  праваабаронцам, каб падтрымліваць яго ў гэты цяжкі час.