У Маладэчне рэкамендуюць чытаць “правільныя” выданні (дакумент)
Маладэчанскія ўлады ў разгар падпісной кампаніі паклапаціліся пра “ажыццяўленне актыўнай інфармацыйнай дзяржаўнай палітыкі аб сацыяльна-эканамічным развіцці Рэспублікі Беларусь і забеспячэнне сістэмнай ідэалагічнай працы” на мясцовых прадпрыемствах. Кіраўнікі дзяржаўных і прыватных арганізацый атрымалі за подпісам старшыні райвыканкама т.зв. “рэкамендацыі” на ведамасную падпіску.
У наступным годзе прапануецца выпісаць стандартны набор дзяржаўных выданняў. Па адным асобніку “Советской Белоруссии” (напісана менавіта так), “Мінскай праўды” і “Маладзечанскай газеты” павінны атрымаць структурныя падраздзяленні арганізацый, ветэраны вайны і працы, ідэалагічны актыў і лепшыя працаўнікі. Акрамя таго, пажадана забяспечыць працаўнікоў “асноўнымі рэспубліканскімі выданнямі”, у лік якіх уваходзіць «Рэспубліка», «Звязда», «Народная газета», «Белорусская нива» і часопіс «Планета».
Здаецца, прымусовай падобную падпіску назваць нельга, адкрыта санкцыямі нікому не пагражаюць. Але чамусьці аб выкананні дадзенага даручэння абавязкова трэба паведаміць да 21 снежня у ідэалагічны аддзел, пазваніўшы па аднаму з шасці (!) тэлефонаў.
