Рэдакцыя «Жыцця Палесся» з гонарам называе сябе прапагандыстам і агітатарам
Мазырская раённая газета "Жыццё Палесся"
Звычайна журналісты дзяржаўных выданняў крыўдзяцца, калі іх называюць прапагандыстамі, лічаць гэта абразай. Разам з тым, карэспандэнты мазырскай раённай газеты «Жыццё Палесся» самі, прычым з гонарам называюць сябе прапагандыстамі. На сайце выдання ў рубрыцы «Газета» надрукаваны дэвіз выдання: «Газета не толькі калектыўны арганізатар, але і калектыўны прапагандыст і агітатар!» Менавіта так, з клічнікам. А прынцып дзеяння газетчыкі запазычылі ў лекараў: «Не нашкодзь!»
Першым, і галоўны накірунак сваёй працы рэдакцыя акрэслівае як асвятленне дзейнасці райвыканкаму і раённага савету дэпутатаў. Формы такой працы: «сустрэчы ў калектыве з кіраўніцтвам раёна, адмысловы дадатак да газеты «Інфармацыйны веснік раённага савета дэпутатаў і раённага выканаўчага камітэту». Калі галоўны і прыярытэтны накірунак дзейнасці выдання – не жыццё чытачоў, іх праблемы, а асвятленне дзейнасці райвыканкаму, то можа, правільней было б, каб і распаўсюджвалі выданне сярод адных чыноўнікаў, а не прымушалі падпісвацца ўсіх працуючых у бюджэтнай сферы?
Другі накірунак газеты - «патрыятызм». «Горад на Прыпяці – асаблівы, інтэрнацыянальны, тут жывуць прадстаўнікі больш чым 23 нацыянальнасцяў і этнічных груп, зарэгістраваны пяць палітычных партыяў, некалькі рэлігійных канфесій. Усе гэта накладае асаблівую адказнасць на журналістаў за грамадзянскую пазіцыю газеты ў справе захавання супакою і салідарнасці людзей».
Дарэчы, накірунак «чытач-газета-чытач» - толькі на пятым месцы ў рэйтынгу прыярытэтных тэм рэдакцыі. Рэдакцыя не ўтрымалася, каб хоць трохі прыбрахаць: спачатку ў тэксце напісана, што наклад – 12 тысяч асобнікаў, а далей у тэксце гаворка ідзе пра 11 тысяч асобнікаў. Ну, на тысячу памыліцца - нічога страшнага.
Ад сціпласці калектыў рэдакцыі не загіне: «З публікацый праглядаецца і арганізатарская, мабілізуючая роля газеты, якая ўсебакова і шырока асвятляе розныя пытанні эканамічнага, культурнага і грамадска-палітычнага жыцця Мазыра і раёна», і «ўсе гэта накладае асаблівую адказнасць на журналістаў за грамадзянскую пазіцыю ў справе захавання спакою і салідарнасці людзей».
