Скарга на адмову пікетавання блукае паміж судамі

Грамадска-палітычны актывіст з Варнянаў (Астравецкі раён) Мікола Уласевіч атрымаў адмоўны адказ на сваю скаргу з абласнога суду за подпісам старшыні Аляксандра Грынкевіча. Скарга на дзеянні Астравецкага райвыканкаму перанакіравана ў Астравецкі раённы суд. Нагадаем, што ў красавіку напярэдадні ўгодкаў чарнобыльскай аварыі Мікола Уласевіч падаў заяўку на правядзенне інфармацыйнага пікету пад назвай “Чарнобыль-Фукусіма-Астравец: ці нам гэта трэба?”. Райвыканкам адмовіў у правядзенні пікету, спаслаўшыся на тое, што нібыта заяўка была паданая з парушэннем тэрмінаў дзеючага заканадаўства. Уласевіч, аднак, сцвярджае, што заяўка была аформлена своечасова – ён падаў яе за 19 дзён да 26-га красавіка. Спярша Уласевіч накіраваў скаргу ў раённы суд, а потым у абласны. Актывіст лічыць, што ўлады папросту маніпулююць тэрмінамі абскарджвання, а дабіцца права на публічнае выказванне сваёй думкі ў сённяшніх рэаліях практычна немагчыма.   

"Праваабарончая хроніка"