КДБ вярнуў частку канфіскаванай у офісе АГП аргтэхнікі і тэлефонную кніжку

Супрацоўнікі КДБ 24 сакавіка вярнулі два камп'ютарныя сістэмныя блокі і тэлефонную кніжку, якія былі канфіскаваныя ў мінскім офісе АГП падчас вобыску 25 снежня.

Вобыск у офісе АГП працягваўся больш за чатыры гадзіны. Было канфіскавана шэсць сістэмных блокаў камп'ютараў (адзін з іх няспраўны), наўтбук (няспраўны), партыйная тэлефонная кніжка, візітоўніцы, дыскі, агітацыйная прадукцыя кандыдата ў прэзідэнты на выбарах-2010 Яраслава Раманчука і інш. — усяго 36 найменняў.
У пастанове на вобыск было ўказана, што ён праводзіцца па месцы працы Алега Корбана. "Ён з'яўляецца намеснікам старшыні мінскай гарадской арганізацыі АГП і працаваў у офісе з 1 лютага па 1 красавіка 2010 года спецыялістам упраўлення па грамадскіх сувязях выканкама АГП", — паведаміла тады БелаПАН намеснік старшыні выканкама АГП Аксана Крышчановіч.