Віцебск: Татальны кантроль за галасаваннем супрацоўнікаў (фота дакументаў)

Да “Праваабаронцаў за свабодныя выбары” трапілі дакументы, якія сведчаць пра тое, што кіраўніцтва не толькі прымушае сваіх работнікаў галасаваць датэрмінова, але і спраўджвае, на якім участку і калі прагаласаваў падначалены.

Так, яшчэ ў першы дзень датэрміновага галасавання прагаласавалі 78% супрацоўнікаў разліковага цэнтру ЖРЭТ Першамайскага раёна Віцебска. Паводле дакумента, які відавочна рыхтаваўся для справаздачы нейкаму вышэйшаму начальству, 14 снежня паспелі прагаласаваць 14 з 18 супрацоўнікаў. Прычым пазначана, што з тых чацвярых, якія не прагаласавалі, адна спадарыня хварэе – значыцца, мае важкую прычыну, раз не пайшла на ўчастак.

Нумары ўчасткаў пазначаны ў другім дакуменце, дзе зафіксаваны імёны, прозвішчы, пасады работнікаў, а таксама ўчасткі, да якіх яны “прыпісаны”. Такім чынам, за работнікамі гэтай установы наладжаны татальны кантроль, ад якога немагчыма ўхіліцца.

“Праваабаронцы за свабодныя выбары”