Пінск: Адкуль анамальная лічба ў першы дзень датэрміновага галасавання?

На пінскім участку для галасавання № 30 - “Установа адукацыі “Пінскі медычны каледж” - прыпісана 1 055 выбаршчыкаў. З іх датэрмінова прагаласавалі 14 снежня  211 чалавек -  то бок, роўна 1/5 ці 20%. Такая анамальная лічба здзіўляе назіральнікаў – няўжо ў навучэнцаў каледжу такое “шалёнае” жаданне пакінуць горад у дзень асноўнага галасавання!

Тым больш, па інфармацыі назіральнікаў з іншых чатырох выбарчых участкаў, у першы дзень датэрміновага галасавання там прагаласавала не больш за 1,5% ад агульнай колькасці прыпісаных выбаршчыкаў.

Назіральнікі адзначаюць, што прыемна здзівіў іх участак № 21, што месціцца ў адміністратыўным будынку ААТ “Будтрэст №2”, - ён абсталяваны празрыстымі скрынямі для галасавання.

У горадзе 10 сябраў БХК і партыі “Справядлівы свет” акрэдытаваліся ў якасці назіральнікаў на 5 выбарчых участках. Па словах дэмакратаў, у першы дзень датэрміновага галасавання на кантралюемых імі участках ніякіх надзвычайных здарэнняў не адбывалася. Сябры  камісій без праблем давалі неабходную інфармацыю. Нават  колькасць выбаршчыкаў, прыпісаных да адпаведнага ўчастку, гэтым разам не стала “сакрэтнай інфармацыяй”.

“Праваабаронцы за свабодныя выбары”