Магілёў: Абласная камісія адхіліла прапановы дэмакрата
Падчас паседжання Магілёўскай абласной выбарчай камісіі 13 снежня яе сябра - актывіст Аб’яднанай Грамадзянскай партыі Уладзімір Парфёнаў - прапанаваў уключыць у парадак дня два пытанні. Першае звязана з дадатковым апячатваннем скрыняў для галасавання, другое – просьба растлумачыць, што азначае фармулёўка “рэальна назіраць за працэсам падліку галасоў” у рашэнні №95 ад 5.11.2010 Цэнтральнай камісіі.
Прапановы Уладзіміра Парфёнава былі вынесены на галасаванне - і ўключаны ў парадак дня.
“Я аглядаў скрыні, якія знаходзяцца на выбарчых участках, супастаўляючы іх з пастановай Цэнтрвыбаркама №53 ад 15 верасня 2010г. (якія яны павінны быць), і пасля наведвання мной 15 выбарчых участкаў я прыйшоў да высновы, што выняць бюлетэні з апячатаных скрыняў цалкам магчыма без пашкоджвання пячатак, - гаворыць Уладзімір Парфёнаў. - На 13 выбарчых участках скрыні для галасавання зроблены такім чынам, што канструктыўна дазваляюць адкрыць іх, не пашкодзіўшы пячатку - прамавугольны каркас змацаваны драўлянымі рэйкамі, да якіх цвікамі альбо шпунтамі мацуюцца бакавіны з фанеры ці ДВП. Каб іх ускрыць, дастаткова мець пры сабе стамеску альбо адкрутку”.
Уладзімір Парфёнаў прапанаваў абласной камісіі апячатаць скрыні для галасавання дадаткова, як гэта робіцца ў паштовых аддзяленнях. Аднак сябра камісіі не знайшоў у гэтым пытанні паразумення і падтрымкі – прапанова так і не была падтрымана.
Другая прапанова датычылася тлумачэння фармулёўкі ЦВК “рэальна назіраць за працэсам падліку галасоў”.
“Што стаіць за гэтым - не вядома. Фармулёўка не дае канкрэтных тлумачэнняў, як назіраць за працэсам падліку галасоў, і гэтая норма Цэнтрвыбаркамам была адведзена на разгляд участковых выбарчых камісій”, - адзначае У.Парфёнаў.
Пасля невялікага абмеркавання гэтае пытанне таксама не было падтрымана.
Акрамя гэтага на паседжанні абмяркоўваліся пытанні аб падрыхтоўцы супрацоўнікаў міліцыі да забеспячэння правапарадку на ўчастках для галасавання, падрыхтоўцы культурна-масавых мерапрыемстваў, каб прыцягнуць выбаршчыкаў на ўчасткі. Таксама была справаздача аб праверцы сувязі паміж камісіямі розных узроўняў.
“Праваабаронцы за свабодныя выбары”
