У склад Гродненскай абласной камісіі ўключаны прадстаўнік АГП

Сёння, 29 верасня, была сфармаваная Гарадзенская абласная ТВК. У яе склад было вылучана 20 кандыдатур. У выніку камісія была сфармаваная з 13 чалавек. Кандыдатуры паасобку не абмяркоўваліся. Быў зачытаны прапанаваны спіс з 13 чалавек, за які і прагаласавалі члены аблвыканкаму і прэзідыўму абласнога Савета. У склад Гарадзенскай абласной ТВК патрапіў прадстаўнік Аб’яднанай Грамадзянскай Партыі Віктар Какарэка. А вось прадстаўніку Беларускай партыі левых “Справядлівы свет” Анатолю Іванчыку месца ў складзе Гарадзенскай абласной ТВК не знайшлося.

Назіральнікі адзначылі характэрную асаблівасць фармавання ТВК: калі ў склад камісіі прапаноўваецца вылучэнец дэмакратычнай партыі, то, як правіла колькасць прэтэндэнтаў у ТВК перавышае максімальна дапушчальную, але калі апазіцыйныя партыі не вылучаюць сваіх прадстаўнікоў, колькасць вылучаных там дакладна супадае з максімальнай колькасцю, з якой можа складацца ТВК.

“Праваабаронцы за свабодныя выбары”