Астравец: Іван Крук не здолеў патрапіць у будучую ініцыятыўную групу Лукашэнкі

Спроба грамадска-палітычнага актывіста Івана Крука адшукаць сляды будучай ініцыятыўнай групы па зборы подпісаў за Аляксандра Лукашэнку скончылася нічым.

Іван Крук, жадаючы асабіста высветліць сапраўдны рэйтынг дзейнага кіраўніка краіны сярод жыхароў Астравеччыны, меў намер увайсці ў будучую ініцыятыўную групу Аляксандра Лукашэнкі, але не знайшоў у сваім раёне ініцыятараў яе стварэння. Тады ён звярнуўся ў Адміністрацыю Прэзідэнта, адправіўшы туды факс адпаведнага зместу. Аднак зварот Івана Крука быў праігнараваны: актывіст не атрымаў ніякага адказу.

Незалежныя назіральнікі мяркуюць, што гэтая гісторыя можа ўскосна сведчыць пра тое, што ініцыятыўныя групы ў падтрымку Аляксандра Лукашэнкі ствараюцца негалосна і пры непасрэдным удзеле і кіраўніцтве дзяржаўных структур, а не звычайных грамадзян.

“Праваабаронцы за свабодныя выбары”