АГП адмовілася ад удзелу ў мясцовых выбарах
З'езд Аб'яднанай грамадзянскай партыі сёння прыняў рашэнне аб адмове ад далейшага ўдзелу ў выбарах у мясцовыя Саветы партыі АГП як палітычнай структуры.
Партыйныя кандыдаты, якія вылучаліся шляхам збору подпісаў, будуць вырашаць самастойна, ці працягваць перадвыбарчую гонку, але ў гэтым выпадку яны будуць выступаць ужо як грамадзяне Беларусі, а не як сябры партыі, адзначыла кіраўніцтва АГП.
- Наша рашэнне аб выхадзе з выбарчага працэсу - гэта адказ на брутальныя дзеянні ўлад у адносінах да кандыдатаў у дэпутаты і сяброў выбарчых камісій ад апазіцыйных партый, - растлумачыў такое рашэнне партыі Анатоль Лябедзька, старшыня АГП. - Такім чынам, мы маем намер пакінуць за сабой права мець магчымасць выбіраць дэпутатаў, а не назіраць за іх прызначэннем. Выхад АГП як партыі з выбарчага працэсу - гэта і заклік да іншых дэмакратычных сіл паспрабаваць змяніць правілы выбарчай сістэмы перад прэзідэнцкімі выбарамі.
З радыкальным рашэннем партыі аб адмове ад выбараў пагадзілася 66 чалавек пры 37 “супраць” і пяці ўстрымаўшыхся, што дазволіла сабраць неабходную колькасць галасоў для зацвярджэння рашэння.
Нязгодныя з партыйным выбарам прадстаўнікі, у прыватнасці Брэсцкай, Менскай і Гарадзенскай абласцей, раскрытыкавалі магчымасць адмовы АГП ад удзелу ў выбарах, спаслаўшыся на тое, што адмова не дазволіць данесці да выбаршчыкаў інфармацыю аб партыі і апратэставаць рашэнні аб недэмакратычных правілах дзеяння выбарчага кодэкса.
Механізм рэалізацыі рашэння аб адмове АГП ад выбараў яшчэ да канца не прадуманы. Магчыма, чатыры хвіліны, выдзеленыя кандыдатам у дэпутаты для выступу са сваёй праграмай на тэлебачанні, прадстаўнікі партыі выкарыстаюць для тлумачэння сваёй пазіцыі адмовы ад выбараў.
- Мы правядзем дадатковае апытанне ўсіх нашых кандыдатаў, каб даведацца іх меркаванні і жаданні, - дадаў Анатоль Лябедзька. - Да таго ж мы не адмовіліся ад ідэі правесці кансультацыі з прадстаўнікамі іншых партый аб неўключэнні кандыдатаў дэмсіл у выбарчыя камісіі.
Старшыня АГП адзначыў, што выбары ў мясцовыя Саветы гэта ні што іншае, як падрыхтоўка да прэзідэнцкай кампаніі. А дэмакратычныя сілы зараз слаба рэагуюць на неўключэнне сваіх кандыдатаў у выбарчыя камісіі, што дасць права ўлады ў будучыні сказаць, што апазіцыя не апратэстоўвала адпаведныя рашэнні.
- Калі ўсе палітычныя структуры зараз заявяць аб выхадзе з выбарчай кампаніі па выбарах у мясцовыя Саветы, то гэта будзе вельмі моцным рашэннем, - заўважыў Анатоль Лябедзька. - Яно пакажа сапраўдную рэакцыю людзей на ўладную самаўпраўнасць і знойдзе водгук і на міжнародным узроўні. Дзякуючы гэтаму падчас падрыхтоўкі да прэзідэнцкіх выбараў мы зможам разлічваць, што з дапамогай міжнародных арганізацый існуючыя правілы выбарчага працэсу сапраўды могуць быць змененыя. Прымаць такія непапулярныя рашэнні, як адмова ад удзелу ў выбарах, лепш на ўзроўні выбараў у мясцовыя Саветы, чым падчас прэзідэнцкай гонкі.
“Праваабаронцы за свабодныя выбары”
