Берасцейскаму праваабаронцу Уладзіміру Вялічкіну – 50 год
Уладзімір Вялічкін.
Свой пяцідзесяцігадовы юбілей адзначае праваабаронца Уладзімір Вялічкін.
Шмат год ён займаецца абаронай правоў чалавека ў сваім рэгіёне, з’яўляецца кіраўніком праваабарончага грамадскага аб’яднаньня “Берасцейская Вясна”, дагэтуль так і не зарэгістраванага мясцовымі ўладамі.
На Берасьцейшчыне Вялічкіна добра ведаюць як прафесіянала ў галіне правоў чалавека, грамадскага актывіста, нястомнага назіральніка пад час выбарчых працэсаў. Неаднойчы ягоная дзейнасьць выклікала хваравітую рэакцыю брэсцкіх чыноўнікаў. Затрыманьні, ператрусы, арышты, пагрозы і выкраданьні “невядомымі асобамі” толькі загартавалі ягоную волю і рашучасьць у адстойваньні дэмакратычных каштоўнасцяў, правоў і свабод грамадзян.
Уладзімір Вялічкін не шкадуючы часу і сілы, аказаў дапамогу не адной сотні сваіх землякоў, абараняючы іх на судовых працэсах, дапамагаючы абскардзіць несправядлівыя рашэньні ў вышэйшых інстанцыях ня толькі ў Беларусі, але і ў Камітэце па правах чалавека ААН.
Праваабарончая супольнасьць Беларусі, сябры і аднадумцы віншуюць берасцейскага калегу Уладзіміра Вялічкіна з пяцідзесяцігадовым юбілеем і жадаюць яму поспехаў ды перамог у абароне правоў і свабод чалавека, жыцьцёвай энергіі, нястомнасьці ў справе служэньня законным інтарэсам сваіх землякоў!
