Сьмяротны прысуд Жуку не адменены
Сёньня Калегія па крымінальных справах Вярхоўнага Суду РБ пад кіраўніцтвам намесьніка старшыні Калінковіча разгледзела касацыйную скаргу асуджанага да сьмяротнага пакараньня Андрэя Жука. На паседжаньні выступілі два адвакаты. Яны прывялі аргументы, якія зьмякчаюць віну падсуднага і назвалі вынесены прысуд занадта жорсткім, несуразьмерным зьдзейсьненаму злачынству. Таксама адвакаты выступілі супраць выкарыстаньня сьмяротнай кары як выключнай меры пакараньня, адзначыўшы той факт, што ў цывілізаваных краінах яно даўно не прымяняецца і разглядаецца як помста. У сваёй прамове А.Жук прызнаў сваю віну, аднак прасіў суд зьмягчыць пакараньне і замяніць сьмяротны прысуд на пазбаўленьне волі.
Судовая калегія не ўлічыла прыведзеныя довады адвакатаў і пакінула вынесены Менскім абласным судом сьмяротны прысуд у сіле.
