Замест незалежнай газэты ў Барысаве пошта дастаўляе дзяржаўнае выданьне

Барысаўская пошта пачала дастаўляць жыхарцы горада замест недзяржаўнай газеты "Борисовские новости" афіцыйнае выданне Барысаўскага райвыканкаму "Адзінства", паведамляе прэс-служба БАЖ.
Каб высветліць недарэчнасць, рэдактар "Борисовских новостей" Анатоль Букас патэлефанаваў на пошту, дзе даведаўся, што ў даставачнай картцы на яго выданне выкрасленая газета "Борисовские новости" разам з індэксам, а замест яе ўпісаная газета "Адзінства". Загадчык вузла паштовай сувязі запэўніў, што гэта "памыліліся на пошце". Пра гэты выпадак распавёў А.Букас падчас "круглага стала" "Перспектывы развіцця сродкаў масавай інфармацыі ў Беларусі", зладжанага 16 верасня ГА "Беларуская асацыяцыя журналістаў" сумесна з прадстаўніцтвам Фонда імя Ф. Эберта ў Беларусі.