Гарадзеншчына: Актывіста БСДГ трымалі на мяжы 6 гадзін

25 верасьня на памежным пераходзе Баброўнікі-Пагранічны быў затрыманы сябра Беларускай сацыял-дэмакратычнай Грамады (БСДГ) Віктар Дзесяцік. Грамадскага актывіста трымалі на мяжы ажно 6 гадзін. Прычынай таму сталі выяўленыя ў машыне Віктара Дзесяціка газеты. У выніку у яго сканфіскавалі 40 асобнікаў газеты “Ніва” – тыднёвіка беларусаў Польшчы. Дзіўна, што мытнікам і спецслужбам падалася крамольнай афіцыйная газета на беларускай мове, якая раней свабодна прадавалася ў кіёсках гарадоў Беларусі.

Трэба зазначыць, што за апошні месяц ужо каля дзесяці грамадска-палітычных актывістаў Гарадзеншчыны падвяргаліся на мяжы асабістаму дагляду.