Гомель: Колькасць месцаў для сустрэч з выбаршчыкамі зведзена да мінімума
Акруговая камісія Гомельскай-Цэнтральнай выбарчай акругі №33 вызначыла месцы для сустрэч кандыдатаў з выбаршчыкамі. Іх два: зала паседжанняў ЧУП "Навучальна-метадычны цэнтр абласнога аб'яднання прафсаюзаў" і актавая зала ЖЭУ-27 у мікрараёне Клянкоўскі.
Гэтае рашэнне акруговай камісіі не спрыяе адкрытасці і галоснасці выбараў, лічыць праваабаронца Леанід Судаленка:
- Канстытуцыя гарантуе права кожнаму на свабоду правядзення масавых мерапрыемстваў. Акрамя таго, Беларусь мае міжнародныя абавязацельствы ў частцы забеспячэння правоў грамадзянаў на мірныя сходы. Міжнародны пакт аб грамадзянскіх і палітычных правах абавязвае кожную дзяржаву не абмяжоўваць гэта права, акрамя выпадкаў, якія неабходныя ў дэмакратычным грамадстве ў інтарэсах нацыянальнай бяспекі, абароны маральнасці і здароўя насельніцтва, правоў і свабодаў іншых грамадзян. Вызначыўшы 2 месцы ў паўмільённым горадзе для сустрэч з выбаршчыкамі, камісія ўступіла ў супярэчнасць з Канстытуцыяй і міжнароднымі абавязацельствамі нашай краіны.
"Праваабаронцы за свабодныя выбары"
