Выратуем «Востраў надзеi»!
Цэнтр для цяжкахворых дзяцей у Мiнску “Востраў надзеi” павiнен дзяржаве 16 млн рублёў i спадзяецца на дапамогу грамадскасцi.
Як паведамiла БелаПАН дырэктар цэнтра Людмiла Гуцько, “Востраў надзеi” — дзённы пансiянат для iнвалiдаў I групы з цяжкiмi захворваннямi: сiндромам Дауна, ДЦП, аўтызмам, эпiлепсiяй i шызафрэнiяй. Бацькi прыводзяць туды дзяцей ранiцай i забiраюць вечарам. Пансiянат арганiзаваны ў 1996 годзе як грамадскае аб'яднанне адаптацыйна-аздараўленчага профiлю. “Да 2001 года мы, як сацыяльны праект, мелi гарантыi фiнансавання з дзяржбюджэту праз рэспублiканскае таварыства iнвалiдаў. Затым, згодна з указам прэзiдэнта, была адменена дапамога грамадскiм арганiзацыям з дзяржбюджэту”, — зазначыла Людмiла Гуцько.
Паводле яе слоў, 16 мiльёнаў рублёў (недаплаты па падатках i запазычанасць па арэнднай плаце) — “непад'ёмная сума” для сацыяльнай групы, якую прадстаўляюць выхаванцы цэнтра. Напрыклад, летась плата за знаходжанне ў пансiянаце павысiлася больш чым у два разы, да 100 тысяч рублёў, у той час як пенсiя для iнвалiда I групы пасля 18 гадоў у Мiнску складае 172 тысячы.
Апрача даходаў ад бацькоўскай платы, “Востраў надзеi” атрымлiвае матэрыяльную падтрымку ад шведскай дабрачыннай арганiзацыi “Зорка надзеi” i разавую дапамогу ад прыватных беларускiх дабрачынцаў, але сродкаў, паводле слоў дырэктара, “не хапае катастрафiчна”. У вынiку з 1 верасня гэтага года кiраўнiцтва цэнтра мусiла адмовiцца ад арэнды свайго падвальнага памяшкання, дзе размяшчалiся майстэрнi па керамiцы, лозапляценнi, трэнажорная зала i склад.
Як паведамiла Л.Гуцько, большасць сем'яў (39 з 45), якiя карыстаюцца паслугамi цэнтра, — няпоўныя, мацi i дзiця. “Мужчыны ў 90% выпадкаў пасля нараджэння псiхiчна хворага дзiцяцi пакiдаюць сем'i. Для таго, каб сям'я выжыла, мацi павiнна працаваць. Сядзелкi мацi нашых дзяцей не па сродках. Такiм чынам, наш цэнтр — гэта апошняя iх надзея”, — падкрэслiла дырэктар. Кожная з такiх сем'яў, паводле яе слоў, мае патрэбу ў самых элементарных рэчах — адзеннi, абутку, памперсах.
Цэнтр “Востраў надзеi” знаходзiцца па адрасе: Мiнск, вул.Сердзiча, 9; тэл. 255-27-87. Усе, хто жадае дапамагчы гэтай арганiзацыi, могуць перавесцi грошы на разлiковы рахунак: 3015004058003 у Мiнскiм аддзяленнi “Цэнтральнае” ААТ “Белзнешэканамбанк”, код 728. УНН 101127909, ОКПО 37413079.
