Новыя затрыманні і ціск на родных каліноўцаў: хроніка пераследу 27-28 лютага Дапоўнена
У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 27-28 лютага 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
У чарговы раз быў затрыманы лекар Руслан Бадамшын
- Руслан Бадамшын
Папярэдне, затрыманне адбылося 28 лютага раніцай, пасля лекара-неўролага павезлі ў Фрунзенскі РАУС.
Вядома, што Бадамшына затрымлівалі як мінімум пяць разоў пасля выбараў — на яго складалі пратаколы і арыштоўвалі.
За данаты затрыманы жыхар Слуцка — супраць яго распачалі крымінальную справу
Праўладныя тэлеграм-каналы 28 лютага паведамілі пра затрыманне жыхара Слуцка, які нібыта ў 2022 годзе зрабіў данат праекту NEXTA. На пакаяльным відэа хлопец кажа, што супраць яго распачалі крымінальную справу і "бліжэйшыя 8 гадоў ён правядзе ў турме".
У Віцебску 28 лютага зноў судзілі прарасійскую актывістку Эльвіру Мірсалімаву
Пра гэта паведаміў тг-канал "Витебск, я гуляю!".
Яе абвінавачвалі паводле арт. 24.23 КаАП (несанкцыянаванае пікетаванне) і арт. 19.10 КаАП (прапаганда, выраб ці дэманстраванне нацысцкай сімволікі).
Першы судовы працэс у дачыненні да вядомай віцебскай прарасійскай актывісткі адбыўся 15 лютага — паводле інфармацыі праваабаронцаў, па выніках таго пасяджэння яе справу адправілі на дапрацоўку.
Сілавікі апублікавалі "пакаяльнае" відэа з жыхаром Магілёва
У відэа ад 28 лютага сцвярджаецца, што яго затрыманне нібыта звязанае з чат-ботам "плана Перамога".
Сілавікі выклалі чарговае відэа з бацькам Дзяніса Урбановіча. Хлопец ваюе на баку Украіны
- Дзяніс Урбановіч
У роліку мужчыну прымусілі заклікаць сына кідаць вайну і вяртацца дамоў — «можа не расстраляюць тут, 10 лет адседзіш».
Падобныя відэа з бацькам Дзяніса сілавікі публікавалі ўжо неаднаразова.
Гомельскія сілавікі пахваліліся тым, як разграмілі кватэру палітычнай эмігранткі
- Разгромленая кватэра Алы Марціновіч
Гаворка пра кватэру псіхалагіні Алы Марціновіч. Пра гэта стала вядома 28 лютага.
Сілавікі выламалі дзверы, раскідалі і зламалі рэчы ў кватэры. Паведамляецца, што ў дачыненні да жанчыны распачата крымінальная справа паводле арт. 361-1 КК (стварэнне экстрэмісцкага фармавання альбо ўдзел у ім).
Пастара з Новалукомля Аляксандра Зарэцкага арыштавалі на 15 сутак — яго затрымалі за малітву за Украіну
- Аляксандр Зарэцкі
Аляксандр Зарэцкі, пастар евангельскай царквы Новалукомля (Чашніцкі раён, Віцебская вобласць) быў затрыманы 22 лютага за тое, што падчас набажэнстваў у яго абшчыне гучала малітва за спыненне вайны ва Украіне, пісала "Хрысціянская візія".
Раней мясцовыя ідэолагі неаднаразова выказвалі прэтэнзіі пастару з гэтай нагоды і пагражалі пераследам. Незадаволенасць уладаў выклікала і тое, што пастар таксама адмаўляўся ўдзельнічаць у палітычных мерапрыемствах, якія яны ладзяць.
Сёння стала вядома, што святару прызначылі 15 сутак арышту паводле арт. 19.11 КаАП (распаўсюд экстрэмісцкіх матэрыялаў).
У Быхаве затрымалі і адправілі пад варту 54-гадовага мужчыну — ён сарваў чырвона-зялёны сцяг
Паводле інфармацыі Быхаўскай пракуратуры, у ноч з 16 на 17 лютага мужчына ішоў міма крамы ў вёсцы Новы Быхаў, на якой вісеў чырвона-зялёны сцяг з арнаментам.
Нібыта "жадаючы прадэманстраваць сваё абразлівае стаўленне да дадзенага сімвала", быхаўчанін хацеў спачатку збіць яго палкай. Калі ў яго гэта не атрымалася, ён з дапамогай лесвіцы дацягнуўся да сцяга і выламаў яго з дрэўкам. Чырвона-зялёнае палотнішча ён схаваў на гарышчы гаспадарчай пабудовы.
Праз некалькі дзён мужчыну затрымалі. Яму прад'яўлена абвінавачанне па арт. 370 КК РБ (здзек з дзяржаўнай сімволікі), паведаміў 27 лютага тг-канал MAYDAY.TEAM.
Сілавікі затрымалі дваіх жыхароў Брэста
Паводле "пакаяльнага" відэа ад 27 лютага, іх абвінавачваюць ва ўдзеле ў паслявыбарчых акцыях пратэсту.
Сілавікі затрымалі сужэнцаў за ўдзел у пратэстах
На "пакаяльным" відэа ад 27 лютага жанчына кажа, што падтрымлівала Украіну, удзельнічала ў акцыях пратэсту, малявала плакаты і нібыта пакідала "абразлівыя каментары" пра міліцыянтаў і прадстаўнікоў улады.
ГУБАЗіК адсправаздачыўся аб затрыманні жанчыны
У "пакаяльным" відэа ад 27 лютага сцвярджаецца, што яна нібыта пакідала абразлівыя каментары пра сілавікоў і Лукашэнку.
