Праваабарончая праграма "Вясна" на Беларускім Радыё Рацыя
Кожны аўторак у 20:05 (паўтор у суботу ў 7:00) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць праз інтэрнэт тут альбо тут (калі не адкрываецца, то карыстайцеся VPN).
Анонс праграмы на 21 снежня:
Хроніка: Палітзняволеная Ксенія Сырамалот сустрэла свой дзень народзінаў у калоніі (кім яна там працуе?); Аліна Стэфановіч, жонка Валянціна Стэфановіча, атрымала доўгачаканы ліст ад мужа (што ён там піша?); а гаспадара бел-чырвона-белай хаты Анатоля Каханчыка ізноў затрымалі.
Крымінальны пераслед: Узгадаем шакуючыя прысуды апошняга тыдня.
- “Ціханоўскі сказаў: я буду сядзець столькі, колькі дазволіць беларускі народ”, — успамінае адзін з удзельнікаў акцый салідарнасці ў падтрымку асуджаных па “справе Ціханоўскага”. Марына Адамовіч, жонка асуджанага Мікалая Статкевіча, сустрэлася з ім пасля прысуду і распавядае, як ён да яго ставіцца. “Рэжым помсціць і карае тых, хто прымусіў яго нейкі час дрыжаць”, — лічыць юрыст “Вясны” Павел Сапелка.
- Адначасова са “справай Ціханоўскага” асудзілі і фронтмэнаў гурта Irdorath — Надзею і Уладзіміра Калачоў. Чаму сілавікі звярнулі ўвагу менавіта на гэты гурт?
- Асудзілі і блогераў — Эдуарда Пальчыса і Вольгу Такарчук , асудзілі 11-ю групу па “справе карагодаў”, асудзілі афіцэра запасу з выслугай у 28 гадоў.
Каментар: У Мінску быў затрыманы сябра Аб’яднанай грамадзянскай партыі Мікола Сяргеенка. У ягонай кватэры правялі ператрус, а потым забралі на допыт, з якога ён так і не вярнуўся. “Падчас ператрусу сілавікі знайшлі некалькі афіцыйна выдадзеных кніжак Някляева, Быкава, Фядуты, знайшлі некалькі старых апазіцыйных улётак з кампаніі Някляева”, — кажа брат Мікалая, Аляксандр Сяргеенка. Разам абодва браты прымалі ўдзел у выбарчай кампаніі 2010 года, што і ў той час прывяло да рэпрэсій. Але цяпер рэпрэсіі значна большыя — Міколу падазраюць у артыкуле 342 КК. Пра сучаснае і мінулае братоў распавядае Аляксандр Сяргеенка.
У музычных паўзах — Irdorath.
Аўдыязапіс выпуску:
