Праваабарончая праграма "Вясна" на Беларускім Радыё Рацыя
Кожны аўторак у 20:05 (паўтор у суботу ў 7:00) у эфіры незалежнай радыёстанцыі “Беларускае Радыё Рацыя” — праграма "Вясна", якая асвятляе падзеі, датычныя правоў чалавека.
Прэм'еру ў эфіры анлайн можна паслухаць праз інтэрнэт тут альбо тут (калі не адкрываецца, то карыстайцеся VPN).
Анонс праграмы на 14 снежня:
Падзея: 10 снежня адзначаўся Міжнародны дзень правоў чалавека. І ў гэты дзень уручылі Нацыянальную праваабарончую прэмію, сярод лаўрэатаў якой: праваабаронца Марфа Рабкова, журналіст Дзяніс Івашын і медыяпраект “Август 2020”. Упершыню за час існавання прэміі амаль усе намінанты сядзяць, а цырымонія адбываецца па-за межамі Беларусі. У рубрыцы пабываем на ўручэнні і пачуем, чым адметныя лаўрэаты.
Па-за межамі: У Міжнародны дзень правоў чалавека “Вясна” заклікала зладзіць акцыі салідарнасці з палітзняволенымі “вясноўцамі”. У Вільні такая акцыя прайшла на Лукішскай плошчы (і месца абрана не выпадкова), а ў Грузіі — у самым цэнтры сталіцы Аджарыі, Батумі… Падпісваліся і паштоўкі салідарнасці. Атрымліваць іх вельмі прыемна — гэта ведае на ўласным досведзе былы палітвязень Яўген Васьковіч, які адседзеў чатыры з паловай гады пасля выбараў-2010.
Каментар: У палітзняволенага філосафа Уладзіміра Мацкевіча выйшла кніга “Отвечая за себя. Записки философа с вредным характером”. Пабываем на яе прэзентацыі ў Вільні, а таксама паспрабуем адказаць на пытанні: чаму пасадзілі Мацкевіча, чаму факультэт філасофіі і сацыяльных навук БДУ зазнаў больш за ўсіх рэпрэсій, ці магчымая філасофія ў несвабоднай краіне — пра ўсё гэта ў размове з культурным аналітыкам Максімам Жбанковым.
У музычных паўзах: кампазіцыі ў выкананні гурта Irdorath, удзельнікаў якога — Надзею і Уладзіміра Калач — асудзілі на два гады пазбаўлення волі.
Аўдыязапіс выпуску:
