"У наступным годзе плануем рабіць мінімум столькі ж, а лепш яшчэ й больш!" Фота

2018 2018-12-29T20:45:11+0300 2018-12-29T21:15:52+0300 be http://spring96.org/files/images/sources/volontery_11.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

У апошні чацвер 2018 года валанцёры і валанцёркі "Вясны" сабраліся, каб падвесці вынікі супольнай працы адыходзячага года і абмеркаваць планы надыходзячага. Ды павіншаваць адзін аднаго са святамі і прыемна правесці разам час.

Сустрэча прайшла ў цёплай і сяброўскай атмасферы. Валанцёры і валанцёркі дзяліліся ўражаннямі "гэтага складанага, але плённага года".

 Валанцёрка і праваабаронца "Вясны" Наталля Сацункевіч адзначыла, што 2018 год стаў для Валанцёрскай службы "Вясны" годам пераменаў і новых магчымасцяў:

"Былі праведзены адукацыйныя мерапрыемствы па ўсёй Беларусі, апрабаваныя новыя формы ўзаемадзеяння, закладзены асновы плённай працы ў наступным годзе. Безумоўна, пры гэтым хапала і радасцяў і засмучэнняў. Нашых назіральніц і назіральнікаў двойчы затрымлівалі праваахоўчыя органы падчас маніторынгу мірных сходаў. Але самае галоўнае ў тым, што валнацёркі і валанцёры "Вясны" не шкадуюць свайго часу для абароны правоў чалавека.

Важнай падзеяй для ўсіх нас стала 70-годдзе Усеагульнай дэкларацыі правоў чалавека. Уклад кожнага і кожнай неацэнны. Трэба памятаць, што самая вялікая справа пачынаецца з маленькага, але асабістага кроку".

Валанцёры і валанцёркі таксама падпісалі віншавальныя паштоўкі для палітвязня Міхаіла Жамчужнага.

Каардынатарка Валанцёрскай службы ПЦ “Вясна” Анісія Казлюк падзялілася сваімі сваімі ўражаннямі і думкамі пасля сустрэчы:

"Было вельмі крута разам з валанцёрамі і валанцёркамі падвесці вынікі году і прыгадаць колькі ўсяго мы паспелі зрабіць за гэты год. Пачуць зваротную сувязь і водгукі аб нашай працы. Падчас такіх мерапрыемстваў разумееш, што зроблена так шмат, хаця здаецца што зусім нічога. Гэта здзіўляе і матывуе на далейшую актыўную працу. Нягледзячы на тое, што 2018 год быў няпростым, і знутры Валантэрскай службы адбылося шмат зменаў і рэформаў, здаецца мы вызначыліся і зразумелі свой далейшы шлях. Цяпер дакладна разумеем, да чаго трэба імкнуцца. У наступным годзе плануем рабіць мінімум столькі ж, а лепш яшчэ й больш!"

"У наступным годзе плануем рабіць мінімум столькі ж, а лепш яшчэ й больш!"
Навагодняя вечарына Валанцёрскай службы ПЦ "Вясна"

Партнёрства

Сяброўства