Крымінальная справа за гвалт да міліцыянтаў: вобшукі, затрыманні і новы фігурант справы Updated

Увечары 1 чэрвеня скончыўся трохдзённы тэрмін з моманту затрымання блогера Сяргея Ціханоўскага і сямі яго паплечнікаў у Гродне 29 траўня. Усе яны затрыманы ў межах крымінальнай справы за гвалт у дачыненні да супрацоўнікаў міліцыі (арт. 364 КК РБ) і знаходзяцца ў мінскім ізалятары на вул. Акрэсціна. Пасля сканчэння трох сутак на волю ніхто з затрыманых не выйшаў, бо тэрмін утрымання пад вартай падоўжаны да 10 сутак з моманту затрымання. Цягам гэтага часу (да вечара 8 чэрвеня) затрыманым мусяць прад'яўвіць абвінавачванні альбо вызваліць.

"Вясна" публікуе звесткі, якія на дадзены момант вядомы пра крымінальную справу ў дачыненні да Сяргея Ціханоўскага і яго паплечнікаў.

Што вядома па стане на 5 чэрвеня?

29 траўня у Гродне падчас правядзення пікету па зборы подпісаў грамадзян у падтрымку вылучэння ў якасці кандыдата ў прэзідэнты Святланы Ціханоўскай супрацоўнікамі міліцыі быў затрыманы кіраўнік ініцыятыўнай групы, блогер папулярнага YouTube канала “Краіна для жыцця”  Сяргей Ціханоўскі і яшчэ, як мінімум 15 грамадзян, якія прымалі ўдзел у пікеце. Затрыманне адбылося пасля таго, як некалькі жанчын спрабавалі стварыць канфліктную сітуацыю. Інцыдэнт скончыўся ўмяшальніцтвам міліцыі, дэманстрацыйным падзеннем сурацоўніка міліцыі на зямлю і затрыманнем Ціханоўскага і іншых удзельнікаў пікету АМАПам. Частку затрыманых пазней вызвалілі.

У Гродне затрымалі блогера Ціханоўскага і яго паплечнікаў. Спіс абнаўляецца

Падчас перадвыбарчага пікету па зборы подпісаў за Святлану Ціханоўскую затрыманы кіраўнік яе ініцыятыўнай групы, блогер Сяргей Ціханоўскі. Таксама верагодна затрыманы людзі з каманды праекту "Краіна для жыцця".

30 траўня Міністэрства ўнутраных спраў паведаміла, што ў сувязі з інцыдэнтам у Гродне следчымі ўзбуджаная крымінальная справа за гвалт у дачыненні да супрацоўнікаў органаў унутраных спраў (па арт. 364 Крымінальнага кодэкса Рэспублікі Беларусь). Вечарам таго ж дня стала вядома, што Сяргея Ціханоўскага, а таксама яшчэ сем затрыманых перавезлі з Гродна ў Мінск у ізалятар часовага ўтрымання на вул. Акрэсціна. 

Затрыманых у Гродне перавезлі ў Мінск. Яны праходзяць па крымінальнай справе

Як паведаміла "Вясне" Святлана Ціханоўская, стала вядома, што восем затрыманых увечары 29 траўня ў Гродне, у тым ліку яе мужа блогера Сяргея Ціханоўскага, перавезлі з гродненскага ізалятара ў Мінск. Узбуджана крымінальная справа па факту артыкула 364 Крымінальнага кодэкса за гвалт у дачыненні да супрацоўнікаў органаў унутраных спраў. Цяпер затрыманыя знаходзяцца ў ізалятары часовага ўтрымання на Акрэсціна.

31 траўня праваабарончая супольнасць Беларус выступіла з заявай аб прызнанні Сяргея Ціханоўскага палітычным зняволеным. Праваабаронцы патрабуюць неадкладнага вызвалення Ціханоўскага і спынення крымінальнага пераследу ў дачыненні да яго, а таксама вызвалення і спынення крымінальнага пераследу ў дачыненні да іншых затрыманых у Гродне грамадзян, калі яны непасрэдна не здзяйснялі гвалтоўных дзеянняў у дачыненні да супрацоўнікаў міліцыі.

Заява праваабарончых арганізацый аб прызнанні Сяргея Ціханоўскага палітвязнем

Патрабуем неадкладнага вызвалення Сяргея Ціханоўскага і спынення крымінальнага пераследу ў дачыненні да яго

1 чэрвеня стала вядома пра затрыманне ўдзельнікаў каманды праекту "Краіна для жыцця" Арцёма Сакава і Канстанціна Сярогіна. Сярогіна пазней адпусцілі, а Арцём затрыманы Ленінскім аддзелам унутраных спраў Гродна на 3 сутак у межах крымінальнай справы.

Праходзяць вобшукі

Увечары 1 чэрвеня стала вядома, што ў гродзенскай кватэры аднаго з затрыманых Уладзіміра Навуміка праходзіць вобшук. Па яго выніках былі выняты ноўтбук, флэшкі. Вобшук праводзілі супрацоўнікі міліцыі. 

Вобшукі прайшлі ў кватэрах ў Яўгена Разнічэнкі, Сяргея Калмыкова, Васіля Баброўскага. Таксама вобшукі прайшлі ў сваякоў некаторых з затрыманых. 2 чэрвеня вобшук прайшоў у доме Аляксандра Арановіча ў Старых дарогах (быў канфіскаваны сістэмны блок).

Таксама невядомы людзі забралі машыну з апаратурай, на якой прыехала ў Гродна каманда Сяргея Ціханоўскага. Машына належыць гомельскаму актывісту Уладзіміру Кузняцову, які даў яе у часовае карыстанне Ціханоўскаму. Уладзімір напісаў заяву пра ўгон яго аўто. 

Пасля пяці вечара 3 чэрвеня на лецішчы Сяргея Ціханоўскага пад Гомелем пачаўся вобшук. Раніцай маці блогера, якая цяпер знаходзіцца са Святланай Ціханоўскай у Менску, патэлефанавалі следчыя і папрасілі прыехаць на лецішча, якое знаходзіцца менш, чым за 30 кіламетраў ад Гомеля, паведаміла TUT.BY Святлана Ціханоўская. Таксама паведамляецца, што вобшук прайшоў на студыі Сяргея. 

Ператрус працягнуўся і ўначы. Паводле інфармацыі, якую паведамілі TUT.BY, падчас яго на лецішчы знайшлі 900.000 долараў. 4 чэрвеня таксама прайшоў паўторны вобшук у гомельскім офісе Сяргея Ціханоўскага.

Крыніца: пры ператрусе на лецішчы ў Сяргея Ціханоўскага знайшлі 900 тысяч долараў

На лецішчы ў блогера Сяргея Ціханоўскага, які з'яўляецца кіраўніком ініцыятыўнай групы па вылучэнні жонкі Святланы Ціханоўскай кандыдатам у прэзідэнты, падчас трэцяга ператрусу знайшлі 900 тысяч даляраў. Пра гэта паведаміў TUT.BY прэс-сакратар ініцыятыўнай групы Аляксандр Кабанаў.

Таксама ноччу 4 чэрвеня пачаўся ператрус у фермера Аляксандра Сіраша ў вёсцы Прудок пад Мазыром, дзе Ціханоўскі здымаў жартоўнае інтэрв'ю з "прыкарытнікамі". Па стане на 10.30 тэлефон фермера недасяжныя.

4 чэрвеня прайшоў паўторны вобшук у доме Аляксандра Арановіча. У сям'і канфіскавалі ўсе наяўныя грошы, якія сям'я адкладала.

Таксама 4 чэрвеня прайшоў вобшук у доме бацькоў Арцёма Сакава. Сярод канфіскаванага — два кубкі, дзве налепкі, дзве маскі з лагатыпам "Страна для жизни", дзесяць дыскаў з гульнямі, фотаздымкі і г.д. У той жа дзень адбыўся вобшук дома ў затрыманага валанцёра ІГ Уладзіміра Кнігі і каардынатаркі ІГ па Гарадзеншчыне Вольгі Каракінай (дзяўчыны затрыманага Дзмітрыя Фурманава).Як яна распавяла "Радыё Свабодзе", ператрус доўжыўся 2,5 гадзіны, «пераглядзелі кожны аркуш». Па словах дзяўчыны, шукалі тэхніку і дакументы. Забралі два планшэты, тэлефон Вольгі, паперы, датычныя да палітычнай дзейнасці, нататнік Дзмітрыя Фурманава, банкаўскую картку і ключы Фурманава, а таксама адкладзеныя грошы — 1,5 тысячы рублёў, 100 еўра і 100 даляраў.

Дзе знаходзяцца затрыманыя?

Днём 2 чэрвеня стала вядома, што Вяргілій Ушак пераведзены ў СІЗА-1 на вул. Валадарскага ў Мінску.

Маці Арцёма Сакава паведамілі "Вясне", што яе сына з гродзенскага ізалятара перавялі ў Мінск. Пазней стала вядома, што ён знаходзіцца ў ізалятары часовага ўтрымання на вул. Акрэсціна.

У твітэры "Краіны для жыцця" паведамляецца, што Святлане Ціханоўскай, якая прыйшла ў ІЧУ на Акрэсціна перадаць перадачу мужу, паведамілі, што яго перавялі ў СІЗА-1 на вул. Валадарскага. 3 чэрвеня Святланы Ціханоўскай пацвердзілі, што Сяргей у СІЗА-1.

3 чэрвеня праваабаронцам "Вясны" стала вядома, што Яўген Разнічэнка дакладна знаходзіцца ў СІЗА-1 на вул. Валадарскага.

Таксама маці Аляксандра Арановіча пацвердзілі месцахнаходжанне яе сына ў СІЗА-1. Там жа знаходзяцца Васіль Баброўскі і Сяргей Калымкоў.

Ці перавялі і астатніх затрыманых у СІЗА-1, у дадзены момант высвятляецца.

Новыя затрыманні 

У Мазыры 4 чэрвеня затрыманыя блогер з каманды Ціханоўскага Аляксандр Цуканаў і ягоны сябар Дзяніс Колас. Дзяніса адпусцілі, а Цуканава апыталі ў Мазырскім РАУС. Таксама ў гэты дзень знік мадэратар сацыяльных сетак "Краіны для жыцця" Дзмітрый Папоў, які знаходзіўся ў Мазыры. Ранкам 4 чэрвеня ён запісаў відэа, у якім распавядае, што яго шукаюць міліцыянты і хочуць затрымаць яго ў межах нейкай крымінальнай справы. Міліцыя забрала ўсе яго рэчы, у тым ліку яго пашпарт. Затым Папоў перастаў выходзіць на сувязь. Паплечнікі мяркуюць, што ён затрыманы.

У Гродне ў той жа дзень днём затрымалі каардынатарку ініцыятыўнай групы Святланы Ціханоўскай па Гарадзеншчыне Вольгу Каракіну. У яе адбыўся ператрус, пасля якога яе адпусцілі. Таксама затрыманы валанцёр ІГ Уладзімір Кніга. Па стане на вечар 4 чэрвеня, ён знаходзіўся ў гродненскім ІЧУ. Ён паведаміў жонцы, што абвясціў галадоўку. 

Што яшчэ трэба ведаць па справе?

• Жонка затрыманага Уладзіміра Навуміка, спаслаўшыся на адваката, паведаміла "Вясне", што верагодна ў пятніцу 5 чэрвеня яму будзе прад'яўлена абвінавачванне.
• Дзяўчыну затрыманага Сяргея Калмыкова выклікалі ў Следчы камітэт у якасці сведкі.