Палітзняволеных журналістаў з Магілёва асудзілі да калоніі
У Магілёўскім абласным судзе 31 ліпеня вынеслі прысуд былым журналістам Алесю Сабалеўскаму і Яўгену Глушкову паводле двух артыкулаў Крымінальнага кодэкса: ч. 1 і ч. 3 арт. 361-1 (стварэнне экстрэмісцкага фармавання або ўдзел у ім), ч. 1 арт. 361-3 (удзел ці падрыхтоўка грамадзяніна Рэспублікі Беларусь на тэрыторыі замежнай дзяржавы ў ваенных дзеяннях без упаўнаважання дзяржавы).
- Алесь Сабалеўскі (злева) і Яўген Глушкоў
Як паведаміў тэлеграм-канал MAYDAY.TEAM, суддзя Дзмітрый Крэнжыеўскі прызначыў Алесю Сабалеўскаму чатыры гады калоніі, а Яўгену Глушкову тры гады калоніі ва ўмовах агульнага рэжыму. Таксама магілёўцам прызначылі штрафы па 200 базавых велічыняў кожнаму. Праваабаронцам не вядомыя падрабязнасці справы.
Алеся затрымалі 12 снежня 2023 года, а Яўгена – пятага студзеня 2024 года. Журналісты знаходзіліся да суда пад вартай больш за сем месяцаў.
Яўген Глушкоў – былы аператар і журналіст. У 90-х ён працаваў на магілёўскім тэлебачанні, пазней супрацоўніцаў з некалькімі гарадскімі парталамі.
Алесь Сабалеўскі – былы магілёўскі блогер і журналіст, які супрацоўнічаў з шэрагам незалежных рэгіянальных выданняў. У 2020 годзе яго неаднаразова затрымлівалі за журналісцкую дзейнасць.
Месца ўтрымання Алеся і Яўгена: Турма № 4. 212011, г. Магілёў, вул. Крупскай, 99А
