Справа Бабкіна: Набраў нумар міліцыі 102 і абразіў прэзідэнта

У судзе Кастрычніцкага раёна Гродна 28 чэрвеня адбыўся разгляд крымінальнай справы мясцовага жыхара Аляксандра Бабкіна, якога абвінавацілі у абразе прэзідэнта Беларусі (ч. 1 арт. 368 КК).

Справу разглядаў суддзя Уладзімір Пазняк, дзяржаўны абвінаваўца – Дар’я Гур’янава.

Маніторынг судовага працэсу ажыццяўляў праваабаронца Раман Юргель.

Справа была ўзбуджаная 25 красавіка, трое сутак Бабкін знаходзіўся ў ІЧУ, затым пад падпіскай аб нявыездзе.

Паводле абвінавачвання, Бабкін, знаходзячыся ў алкагольным ап'яненні, патэлефанаваў на нумар 102 і зневажальна і негатыўна выказаўся на адрас прэзідэнта, прынізіў ягоныя гонар і годнасць, тым самым нанёс публічную абразу.

Сваю віну прызнае цалкам.

- Па якой прычыне вы тэлефанавалі? - пытаецца пракурор

 - Да мяне пасля прэзідэнцкіх выбараў у дзверы некалькі разоў ламілася міліцыя і АМАП, я не адчыняў, баяўся. 10 жніўня я быў затрыманы і аштрафаваны.

Аляксандр Бабкін у ноч з 10 на 11 жніўня 2020 падчас пратэстаў у Гродна быў затрыманы, адпраўлены ў СІЗА і закрытым выязным судом на наступны дзень быў аштрафаваны на 15 базавых велічынь.

Суддзя: "А чаму вы самі не пайшлі ў міліцыю высветліць мэту іх візітаў, па якой прычыне вы абражалі кіраўніка дзяржавы?”

- Я быў п'яны і патэлефанаваў, не даваючы сабе справаздачы. Я разумею, што здзейсніў злачынства. Больш такога не паўторыцца.

Сведка Ганна Самойленка працуе тэхнікам сувязі службы міліцыі, прымала той званок:

- Грамадзянін Аляксандр Бабкін патэлефанаваў ноччу і спытаў, ці знаходзіцца ён у вышуку і выказаўся нецэнзурнай лаянкай. Размовы на палітычную тэму не было. Было зразумела, што чалавек нападпітку. Мы бачылі нумар тэлефона і на каго ён зарэгістраваны.

Размова доўжылася 4 хвіліны. Самойленка запоўніла картку і паводле службовых абавязкаў перадала інфармацыю аператыўнаму дзяжурнаму і ў РАУС.

Наступная сведка Лідзія Каханская, тэхнік сувязі службы міліцыі 102 Гродзенскага УУС, патлумачыла, што чула гэты званок пры паўторным праслухоўванні.

Чула, што грамадзянін Бабкін, спытаў, ці знаходзіцца ён у вышуку, затым назваў прозвішча Лукашэнкі і нецэнзурна выказаўся ў яго адрас.

Пракурор удакладняе паказанні сведак: "Тэлефанаваў і абражаў прэзідэнта?”

- Так, пацвярджаю. Па размове было зразумела, што п'яны быў.

У часе судовых спрэчак пракурор казаў, што Бабкін злоўжывае алкаголем, прыцягваўся да адміністрацыйнай адказнасці ў жніўні 2020 за пікетаванне. Віна пацвярджаецца сабранымі доказамі, паказаннямі сведак-тэхнікаў сувязі міліцыі, пратаколамі агляду, экспертным заключэннем і матэрыяламі справы.

Пасля абвяшчэння прысуду Аляксандру Бабкіну.

Па заключэнні эксперта Фіялавай, выказаўся ў адрас Прэзідэнта зняважлівымі словамі. Наўмысна абразіў прэзідэнта, разумеў, што наносіць шкоду і прыніжае аўтарытэт гонар і годнасць Прэзідэнта.

Пракурор, улічваючы раскаянне абвінавачанага, просіць прызначыць яму пакаранне тэрмінам на адзін год у калоніі агульнага рэжыму, узяць пад варту ў зале суда. Таксама патрабуе прымяніць прымусовае лячэнне ад алкагалізму.

Адвакат даводзіў, што Бабкін не ўяўляе небяспекі для грамадства, можа быць пакараны і штрафам. Просіць суд абвясціць пакаранне выпраўленчымі працамі без акіравання ва ўстанову адкрытага тыпу.

Суд пастанавіў прызнаць Аляксандра Бабкіна вінаватым па ч. 1 арт. 368 КК і прызначыць яму адзін год пазбаўлення волі ў калоніі агульнага рэжыму, таксама прымяніць прымусовае лячэнне ад алкагалізму. Мабільны тэлефон канфіскаваны, кампутар і клавіятуру - вярнуць асуджанаму.

Пад час заключэння пад варту Бабкін паспеў выгукнуць “Жыве Беларусь!” і “Будзем вольнымі“.