Каля 150 чалавек выйшлі ў Брэсце на акцыю пратэсту супраць запуску завода АКБ Фота

13.04.2020 Тэгі: грамадства, свабода мірных сходаў, экалагічныя правы

https://spring96.org/be/news/96520 2020 2020-04-13T12:19:53+0300 2020-04-13T12:19:53+0300 2020-04-14T11:26:34+0300 be https://spring96.org/files/images/sources/brest_zavod_akb_aprel_2020_1.jpg Праваабарончы цэнтр «ВЯСНА» Праваабарончы цэнтр «ВЯСНА» Праваабарончы цэнтр «ВЯСНА»

Праваабарончы цэнтр «ВЯСНА»

Акцыя 12 красавіка супраць запуску завода АКБ. Фота Tut.by

У нядзелю 12 красавіка па цэнтральных вуліцах Берасця прайшлі актывісты, якія выступаюць супраць запуску акумулятарнага завода. Праваабаронца Уладзімір Вялічкін паведаміў TUT.BY, што ў акцыі прыняло ўдзел каля 150 чалавек.

Праціўнікі акумулятарнага завода выйшлі на плошчу Леніна каля 12.00. Выступаючы перад прысутнымі, адзін з лідараў пратэсту Дзмітрый Бекалюк праз гучнагаварыцель нагадаў пра тое, што летась падчас візіту ў Брэст Прэзідэнт Аляксандр Лукашэнка сказаў, што берасцейцы «будуць вырашаць, ці быць гэтаму заводу і якім будзе гэты завод». Пры гэтым 9 красавіка, нягледзячы на няспынныя пратэсты, праект будаўніцтва акумулятарнага завода пад Брэстам атрымаў станоўчае заключэнне дзяржаўнай экалагічнай экспертызы.

: Фота Tut.by

"Нам далі пасыл: людзі нічога не вырашаюць", — сказаў Дзмітрый Бекалюк.

Пасля яго выступу на плошчу выйшлі супрацоўнікі міліцыі, якія па гучнагаварыцелі папярэдзілі ўдзельнікаў акцыі аб адказнасці за ўдзел у несанкцыянаваным мерапрыемстве. Людзі сустрэлі іх свістам і крыкамі "Ганьба".

Затым удзельнікі пратэсту прайшлі калонай па маршруце: плошча Леніна — вуліца Пушкінская — Савецкая — пляцоўка каля ЦУМа. Падчас шэсця людзі разгарнулі банер "Не заводу АКБ", а таксама скандавалі: "No pasaran" (з гішп. "не пройдуць" — палітычны лозунг, які выказвае цвёрды намер абараняць сваю пазіцыю), "Чыноўнікаў на нары", "Не заводу АКБ".

: Фота Tut.by

Шэсце скончылася на плошчы ля Цэнтральнага ўнівермага. Абышлося без затрыманняў.

Кампанія "АйПауэр" 9 красавіка атрымала станоўчае заключэнне дзяржаўнай экалагічнай экспертызы па будаўнічым праекце акумулятарнага завода. Як паведамляе "Брестская газета", наступны этап рэалізацыі праекта – гэта правядзенне індывідуальных выпрабаванняў і комплекснае апрабаванне змантаванага абсталявання, выпрабаванне сістэм водазабеспячэння, каналізацыі, ацяплення і вентыляцыі і іншых сістэм. Пры гэтым грамадская экалагічная экспертыза праекта, якую даручыў правесці Прэзідэнт Аляксандр Лукашэнка, так і не адбылася.