Па дарозе ў Хатынь затрыманыя актывісты: на двое з іх складзеныя пратаколы Дапоўнена
Савецкае РУУС г. Мінска. Фота: ПЦ "Вясна"
Праваабаронцам стала вядома, што супрацоўнікі міліцыі 22 сакавіка затрымалі сяброў Руху Салідарнасці “Разам” Віктара Кавалькова, Надзею Батуру, Сяржука Мацкойця, Віталя Лухавіча. Яны ехалі ў Хатынь, каб ускласці там кветкі. У Хатыні сёння праводзіцца Дзень памяці, прымеркаваны да чарговай гадавіны са дня спалення вёскі.
Як паведамляе Надзея Батура на сваёй старонцы ў фэйсбуку, прычынай затрымання стала абвінавачанне ва ўгоне невядомага аўтамабіля. Акалічнасці той справы невядомыя.
Вядома, што яны дастаўленыя ў РУУС Савецкага раёна г. Мінска. Пазней кіраўнік Руху Салідарнасці “Разам” Вячаслаў Сіўчык паведаміў у фэйсбуку: "Тры чалавека ўжо на волі. Чакаюць кіроўцу, які яшчэ ў РУУСе".
Па словах актывісткі Надзеі Батуры, на яе і святара неафіцыйнай Беларускай аўтакефальнай праваслаўнай царквы Віктара Кавалькова складзеныя пратаколы за непрышпіленыя пасажырскія рэмні бяспекі, паведамляе naviny.by. Яны ехалі на заднім сядзенні.
