Аляксея Шчадрова збіла міліцыя
Аляксей Шчадроў. Фота: Беларускае Радыё Рацыя.
Кіраўніка прытулку для бяздомных абвінавацілі ў тым, што ён скраў гаманец.
Як паведамляе БелСАТ, Аляксея Шчадрова, былога медыка, які адкрыў прытулак для бяздомных пад Шчучынам, усю ноч дапытвалі і збівалі міліцыянты. Той прызнаўся, каб яны спыніліся.
31 студзеня Аляксей Шчадроў, вядомы таксама як брат Луіджы, паехаў у бальніцу Шчучынскага раёну, каб вырваць зуб. Пасьля таго, як ён вярнуўся дахаты, да яго завіталі міліцыянты.
«Мяне абвінавацілі ў тым, што ў шпіталі я нібыта забраў кашалёк з трэцяга паверху хірургіі. Міліцыянты пабачылі на камэрах назірання, што я, раней судзімы, быў у той час у шпіталі – і забралі мяне», – распавядае «Белсату» Аляксей Шчадроў.
Наступныя суткі Аляксей Шчадроў правёў у міліцыі, дзе яго збівалі, дапытвалі і зноў зьбівалі.
«Двое старэйшыя лейтэнанты сказалі, што праколюць мне вушы і пачалі шчоўкаць стэплерам каля галавы. Іншы старшына запытаўся, колькі ўдараў дручком я вытрымаю – і пачаў біць мяне па плячах і па руках», – распавядае Шчадроў.
Міліцыянты папярэдзілі мужчыну, што калі ён не прызнаецца, яны будуць біць яго ўсю ноч.
«Я не спаў усю ноч. І ўсю ноч яны білі мяне па галаве і па плячах. Каб яны спыніліся, я сказаў, што гэта я скраў кашалёк, але выкінуў яго. Калі мы паехалі ў месца, дзе я яго «выкінуў», гаманца там не было. Потым паехалі ў іншае месца – і там таксама не было. Калі раніцай прыйшлі аператыўнікі, сталі разьбірацца ды паглядзелі ўсе камеры назірання, яны зразумелі, што нешта не складваецца», – працявае ён.
Пасьля таго, як аператыўнікі пабачылі на запісах відэаназірання, што Шчадроў не заходзіў на той паверх, дзе зьнік гаманец, яго адпусцілі. Дахаты ён вярнуўся ўвечары пятніцы.
Аляксею Шчадрову – 33 гады. У маладосьці ён працаваў фэльчарам «хуткай дапамогі». Маючы доступ да лекаў, ён пачаў гандляваць прэпаратамі, якія прадаюцца ў аптэках па рэцэпту. За гандаль наркотыкамі ён адседзеў тры гады.
«За ўсе свае злачынствы я расплаціўся», – кажа Шчадроў.
Сем гадоў таму, пасля вызвалення, мужчына набыў у вёсцы Аляксандраўка Шчучынскага раёну хату, дзе зарганізаваў прытулак, у якім даглядае бяздомных людзей, дапамагае ім аднавіць дакумэнты і вярнуцца да нармальнага ладу жыцця.
Шчадрову не дапамагаюць ані Царква, ані Касьцёл, прытулак ня мае афіцыйнай рэгістрацыі – і не даспадобы ўладам. Мясцовыя чыноўнікі ня раз прымушалі Шчадрова зачыніць асяродак, пазалетась супрацоўнікі КДБ зладзілі ў прытулку ператрус.
«Улада, якая не ў стане дапамагчы, яны топчуць гэтую асобу, гатовыя расьцерці. То бок: «мы не дапамагаем, і ты ня будзеш дапамагаць», – распавядаў нашаму каналу адзін з бяздомнікаў, які жыў у Шчадрова.
Грашыма і адзеннем прытулку дапамагаюць прыватныя асобы, а таксама сябры партыі «Беларуская хрысціянская дэмакратыя».
Навіны ад Spring96.org у Telegram. Падпішыся на наш канал https://t.me/viasna96
