Праваабаронца Алена Маслюкова можа стаць "Лідэркай году”
Ілюстратыўнае фота.
Уручэнне штогадовых прэмій Чэмпіёнаў грамадзянскай супольнасці адбудзецца ў чацвер,10 студзеня. Пра падзею паведамляеццца на старонцы Асамблеі няўрадавых дэмакратычных арганізацый у фэйсбуку.
Па традыцыі, пераможцы вызначаюцца ў некалькі розных намінацыях. У намінацыі «Лідэр/лідэрка году» сёлета прадстаўленыя:
Ірына Альхоўка, старшыня праўлення МОО "Гендерные перспективы", якая прасоўвала праект закону аб супрацьдзеянні хатняму гвалту;
Павел Белавус, заснавальнік Арт Сядзіба, Адзін з арганізатараў святкавання 100-годдзя БНР;
Вольга Вялічка, дырэктарка Гродзенскага дзіцячага хоспіса, якая арганізавала сацыяльны праект стварэння зручнай вопраткі для людзей з інваліднасцю, выставу "Жыццё ў поўным колеры";
Алена Маслюкова, праваабаронца, лідэрка ініцыятывы супраць запуску заводу па вытворчасці бялёнай цэлюлозы;
Генадзь Фядыніч, старшыня Незалежнага прафсаюза РЭП, які нягледзячы на пераслед праз фальшывую крымінальную справу, працягвае бараніць правы працоўных.
Названыя таксама кандыдатуры на намінацыю "Партнёрства году".
Гэта конкурс “Паскарэнне”. (Talaka.by - Кропка збору неабыякавых людзей, Onliner, група кампаніяў "Gurtam" і velcom арганізавалі конкурс і збор грошаў для найлепшых грамадска значных праектаў).
Праект "DVEPOLOSKI". (Старшыня Лідскай арганізацыі інвалідаў-вазочнікаў Аляксандр Аўдзевіч і Лідзкая фабрыка красовак запусцілі стартап, у межах якога палова сродкаў з продажу абутку ідзе на дабрачыннасць).
Другая (не)канферэнцыя настаўнікаў EdCamp Belarus 2018. (Таварыства беларускай школы, Global Shapers Minsk Hub пры падтрымцы Амбасады Нідэрландаў, кампаній "Кока-Кола Бэўрыджыс Беларусь" і Activia, PACT, USAID і Imaguru: Бизнес-Клуб/Startup Hub).
Кааліцыйная праца праваабарончых НДА Беларусі пры падрыхтоўцы дакладу для КПЧ ААН. (У выніку прадстаўлення альтэрнатыўнага дакладу і супольных адвакацыйных дзеянняў больш як 60 рэкамэндацый Камітэту правоў чалавека (КПЧ) ААН да ўраду Беларусі маюць у сваім складзе прапановы беларускіх праваабаронцаў дзеля выпраўлення сітуацыі з правамі чалавека ў краіне).
Адукацыйны курс "Мэнэджмэнт у НКА". (Фонд "Новая Еўразія" і Інстытут бізнесу БГУ запусцілі сумесны праект - адукацыйны курс "Мэнэджэмэнт у некамерцыйнай арганізацыі", заснаваны на спалучэнні акадэмічных стандартаў і рэальнага досведу беларускіх НКА).
Прэтэндэнты на іншыя намінацыі пакуль не называліся.
Прэмія «Чэмпіёны грамадзянскай супольнасці» — штогадовая прэмія, якой адзначаюцца найбольш значныя, выбітныя і яскравыя асобы, арганізацыі і падзеі знакавыя для развіцця беларускага трэцяга сектара. Прэмія заснавана Асамблеяй няўрадавых дэмакратычных арганізацый Беларусі ў 2009 годзе.
