Маёраву і Патапаву пакаралі штрафамі за збор подпісаў у падтрымку беларускай мовы

2018 2018-03-30T08:09:21+0300 2018-03-30T08:26:01+0300 be https://spring96.org/files/images/sources/dashkevich-zbor-podpisy.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Зміцер Дашкевіч збірае подпісы ў абарону беларускай мовы. Фота: Наша Ніва.

Зміцер Дашкевіч збірае подпісы ў абарону беларускай мовы. Фота: Наша Ніва.

Суды працягваюць разглядаць адміністрацыйныя справы ўдзельнікаў збору подпісаў у падтрымку беларускай мовы і адкрыццё нацыянальнага ўніверсітэта, які праходзіў у Мінску і некаторых гарадах 21 лютага і ў наступныя дні.

У судзе Савецкага раёна Мінска 29 сакавіка разглядаліся адміністрацыйныя справы Вольгі Маёравай і  Аляксандры Патапавай.   Іх абвінавацілі ва ўдзеле ў несанкцыянаваным масавым мерапрыемстве па арт. 23.34 КаАП. Правапарушэннем суд палічыў збор подпісаў у падтрымку беларускай мовы і адкрыццё нацыянальнага ўніверсітэта, які праходзіў у Мінску 21 лютага. Вольга Маёрава атрымала штраф у памеры 35 базавых велічынь, а Патапава штраф у памеры 10 базавых велічынь.

На гэты час вядома, што штрафы за збор подпісаў у падтрымку беларускай мовы атрымалі Пракаповіч Павел (двойчы за 2 пікеты агулам 100 базавых), Гусева Наста (15 базавых), Сергіенка Ягор (50 базавых), Дашкевіч Зміцер (40 базавых), Мандзік Дзяніс (25 базавых), Смілевіч Ганна (15 базавых). Пратаколы ў дачыненні да яшчэ двух зборшчыкаў подпісаў – Эдуарда Пальчыса і Рамана Ганчарова суды адправілі на дапрацоўку.

Такім чынам, агульная сума штрафаў па стане на 29 сакавіка складае 290 базавых велічынь, альбо 2 960 еўра.

Нагадаем, збор подпісаў у падтрымку беларускай мовы распачаўся ў Мінску і некаторых гарадах Беларусі 21 лютага, у Міжнародны дзень роднай мовы. 27 лютага лідэр «Маладога фронту» Зміцер Дашкевіч перадаў у Міністэрства адукацыі больш за 2 тысячы подпісаў.

Апошнія навіны

Партнёрства

Сяброўства