«1050 дзён самоты»
Тэлеканал «Белсат» 21 лістапада пакажа дакументальны фільм рэжысёра Алега Дашкевіча «1050 дзён самоты». Гэтая стужка распавядае на прыкладзе сям’і былога палітвязня Алеся Бяляцкага пра атмасферу, у якой жывуць і працуюць беларускія праваабаронцы.
Лідар беларускіх праваабаронцаў, старшыня Праваабарончага цэнтра “Вясна” Алесь Бяляцкі быў асуджаны за дапамогу ахвярам палітычных рэпрэсіяў. У адзін момант жыццё сям’і Бяляцкіх змянілася самым радыкальным чынам. Алесь апынуўся ў турме, ягоны сын Адам вымушаны быў ад’ехаць з краіны. У раптам апусцелай кватэры на доўгія тры гады засталася толькі адна Алесева жонка Наталля. Самотная, але непераможная жанчына... Гэты фільм пра вечныя чалавечыя пуцяводныя зоркі, без якіх існаванне любога з нас губляе ўсялякі сэнс. Гэты фільм пра веру, надзею і любоў. Гэты фільм пра перамогу годнасці над падступнасцю, праўды над маной, кахання над здрадай...
Прома-ролік фільма можна паглядзець ніжэй.
Цалкам фільм выйдзе ў эфір 21 лістапада ў 21-55.
