Усевалад Аўраменка аштрафаваны за перфоманс на Кастрычніцкай плошчы
Суд Цэнтральнага раёна Менска.
У судзе Цэнтральнага раёна Менска 26 кастрычніка разглядалася адміністрацыйная справа ўдзельніка стыхійнай акцыі пратэсту на Кастрычніцкай плошчы ў Менску 11 кастрычніка Усевалада Аўраменкі. Яго вінавацяць ў дробным хуліганстве (арт. 17.1 КаАП РБ), якое ён нібыта здзейсніў у грамадскім месцы.
На судзе выступілі сведкамі супрацоўнікі АМАПУ Валянцін Заека і Андрэй Салодкі, якія складалі пратакол правапарушэння, знаходзячыся на службе ў той дзень у цывільнай вопратцы.
Яны засведчылі, што Аўраменка брыдкасловіў і нахабна чапляўся да грамадзян, а на заўвагі супрацоўнікаў міліцыі не рэагаваў. Да довадаў Усевалада Аўраменкі суддзя Вікторыя Шабуня не прыслухалася і вынесла пастанову аб пакаранні яго штрафам у памеры 10 базавых велічынь (1 800 000 рублёў).
Нагадаем, супрацоўнікі міліцыі апрача 5 актывістаў анархісцкага руху, якія правялі ноч у Цэнтры ізаляцыі правапарушальнікаў, былі затрыманыя яшчэ двое. Гэта ўдзельнікі мастацкага перфомансу Яўген Амелькаў і Усевалад Аўраменка. На іх таксама складзеныя пратаколы адміністратыўнага правапарушэння.
