Дзяржава кампенсуе маральную шкоду актывісту Пятру Іванову

Актывіст Пётр Іваноў з Віцебска дамогся частковага задавальнення свайго пазову да казны Рэспублікі Беларусь. Дзяржава абавязана выплаціць яму кампенсацыю прычыненай маральнай шкоды ў памеры 25 000 000 рублёў. Такое рашэнне вынес суд Кастрычніцкага раёна г. Віцебска пад старшынствам намесніка старшыні суда Алены Папковай.

У нацыянальнай судовай практыцы гэта надзвычай рэдкі выпадак, калі чалавек змог дамагчыся хаця б частковай кампенсацыі маральнай шкоды.

Прычынай падачы пазову актывістам стаў шматгадовы пераслед з боку мясцовых уладаў і праваахоўных органаў. Сярод такіх фактаў, на якія Пётр Іваноў спасылаўся ў сваім пазове, складанне адміністрацыйнага пратаколу за агітацыйны пікет на выбарах 2010 года, затрыманне за распаўсюд улётак з заклікам падтрымаць зняволенага віцебскага апазіцыянера ў судзе і наступнае надуманае абвінавачанне ў нецэнзурнай лаянцы, штрафы за тое, што ён , на думку кіраўніцтва ДАІ, выклаў недакладныя факты ў скарзе на парушэнне кіроўцам міліцэйскага аўтамабіля правілаў дарожнага руху і непадпарадкаваўся супрацоўнікам міліцыі, якія гвалтоўна цягнулі яго ў суд за ілжэсведчанні. Пасля апошніх падзей на Пятра Іванова ўзбудзілі крымінальную справу за нібыта абразу супрацоўнікаў міліцыі. Таксама актывіст атрымліваў пагрозы аб дэпартацыі, якія паступалі на ягоны адрас з мясцовага Аддзела грамадзянства і міграцыі. У 2013 годзе ён накіроўваў скаргу на дзеянні службовых асоб дзяржаўных органаў Рэспублікі Беларусь на адрас спадарыні Маргарэт Сэкаг’і, спэцдакладчыка Арганізацыі Аб’яднаных Нацый па пытанні аб сітуацыі з праваабаронцамі. 

Сам Пётр Іваноў да ўступлення рашэння суда ў законную сілу, падаў у той жа суд заяву, у якім сфармуляваў сваю пазіцыю ў адносінах да вынясення судовага рашэння.

«З рашэннем суда аб памеры спаганя сродкаў цалкам не згодны, знаходжу яго шматразова і беспадстаўна зніжаным, відавочна неадпаведным рэальнаму памеру маральнай шкоды, прычыненай злачынным пераследам дзяржаўнымі органамі Рэспублікі Беларусь загадзя невінаватага грамадзяніна Расійскай Федэрацыі па сфабрыкаванай крымінальнай справе. У пададзеным пазове мінімальны памер маральнай шкоды, які быў мне рэальна нанесены незаконнымі дзеяннямі органаў крымінальнага пераследу ў перыяд з 2007 г. па 2012 г., паказаны дакладна і абгрунтавана. Ён і павінен быць кампенсаваны. Названае рашэнне суда на гэтай справе мной абскарджана ня будзе толькі таму, што ўсе органы дзяржаўнай улады, уключаючы ўладу судовую з'яўляюцца нелегітымнымі, законы не дзейнічаюць, няма незалежнага і бесстаронняга суда. Выразна ўсведамляю, што ў такіх умовах дамагчыся поўнага пакрыцця рэальна прычыненай маральнай шкоды на гэтай справе абсалютна немагчыма і нават неверагодна».

У існуючых абставінах суддзя Е. Папкова была вымушана накіраваць выканаўчы ліст у дачыненні да казны Рэспублікі Беларусь у аддзел прымусовага выканання Маскоўскага раёна г. Мінска для выканання па тэрытарыяльнасці. Адтуль выканаўчы ліст у дачыненні да Міністэрства фінансаў РБ аб спагнанні сумы ў рахунак матэрыяльнага пакрыцця маральнай шкоды ў памеры 25 000 000 рублёў на карысць Іванова Пятра паступіў у фінансавае кіраванне Віцебскага гарвыканкама для належнага выканання.

Першапачаткова сума, якую запрасіў Пётр Іваноў была ў разы больш за атрыманую ім кампенсацыю і складала 7.715.833.000 рублёў. Таксама актывіст у сваёй заяве адзначыў, што ён колькі разоў пераканаўся на практыцы, у тым ліку, як праваабаронца у тым, што стан нацыянальнага правасуддзя і беларускіх судоў вельмі неспрыяльны.

Нагадаем, жыхар Віцебска Пётр Іванощ, грамадзянін Расійскай Федэрацыі, прадстаўнік партыі "Адзіная Расія" і актывіст кампаніі "Гавары праўду" не аднойчы падвяргаўся пераследам з боку ўладаў. У перыяд з 2007 па 2014 гады ён быў некалькі разоў затрыманы за сваю грамадскую дзейнасць. А ў 2013 годзе ў дачыненні да яго была заведзеная крымінальная справа пасля спробаў даказаць, што супрацоўнікі ДАІ парушылі правілы дарожнага руху. Пасля шматгадовага ціску актывіст вырашыў дамагацца атрымання маральнай кампенсацыі ад дзяржавы.