Камітэт па правах чалавека ААН прыняў да разгляду скаргу Іллі Дабратвора

Як стала вядома Праваабарончаму цэнтру "Вясна", днямі Ілля Дабратвор атрымаў паведамленне з Камітэта па правах чалавека ААН пра рэгістрацыю яго скаргі на парушэнне права актывіста на свабоду мірных сходаў і свабоду выказвання меркаванняў.

Ілля Дабратвор 30 снежня 2013 года знаходзіўся каля памятніка Тарасу Шаўчэнку ў Мінску, насупраць амбасады Украіны ў Беларусі, і трымаў дзяржаўны сцяг Украіны. Гэтым дзеяннем грамадскі актывіст хацеў выразіць салідарнасць і падтрымку ўкраінскаму народу на яго шляху да еўрапейскай інтэграцыі. За гэта праз 12 дзён Ілля Дабратвор быў затрыманы і прыцягнуты да адміністрацыйнай адказнасці. Суд Цэнтральнага раёна г.Мінска пакараў яго штрафам у 8 базавых велічынь за “Парушэнне парадку арганізацыі і правядзення масавага мерапрыемства” (арт. 23.34 КаАП).

Грамадскі актывіст не склаў рук: падаў скаргу на рашэнне суда Цэнтральнага раёна г.Мінска ў Мінскі гарадскі суд, а потым і ў Вярхоўны суд Рэспублікі Беларусь. Скаргу яго абодва суды адхілілі, а рашэнне аб адміністрацыйным правапарушэнні пакінулі без зменаў. Такім чынам, Ілля Дабратвор прайшоў вычарпаў усе сродкі ўнутраннай прававой абароны ў спробе адстаяць сваі правы, на што патраціў амаль год.

9 верасня 2014 года ён падаў скаргу ў Камітэт па правах чалавека ААН (КПЧ), у якой звяртаў увагу на парушэнне яго права на свабоду мірных сходаў і свабоду выказвання меркавання і папрасіў:

• прызнаць яго ахвярай парушэння дзяржавай-удзельніцай яго правоў прадугледжаных артыкуламі 19 і 21 Міжнароднага пакта аб грамадзянскіх і палітычных правах;
• указаць дзяржаве на неабходнасць перагляду справы аб адміністрацыйным правапарушэнні, а таксама выплаце кампенсацыі ў суме не менш памеру штрафу і сумы судовых выдаткаў;
• указаць дзяржаве на неабходнасць прывядзення нацыянальнага заканадаўства аб свабодзе мірных сходаў у адпаведнасць з Міжнародным пактам аб грамадзянскіх і палітычных правах і на недапушчальнасць паўтарэння падобных парушэнняў у будучыні.

Нарэшце на днях актывіст атрымаў адказ з КПЧ:

“Ваш зварот, які быў прадстаўлены Камітэту па правах чалавека для разгляду ў адпаведнасці з Факультатыўным пратаколам да Міжнароднага пакта аб грамадзянскіх і палітычных правах, быў зарэгістраваны ў якасці паведамлення №2622/2015.

У адпаведнасці з правілам 97 Працэдуры Камітэта, копія паведамлення была накіравана дзяржаве-удзельніцы сёння з просьбай, што любая інфармацыя ці назіранне ў дачыненні да пытання па прымальнасці і сутнасці паведамлення павінна быць накіравана ў Камітэт на працягу шасці месяцаў. Любы адказ ад дзяржавы-удзельніцы будзе вам паведамлены своечасова, каб вы маглі яго пракаментаваць, калі пажадаеце”.

Актывіст упэўнены, што няхай пакуль Беларусь не гатовая несці адказнасць па ўзятым на сябе абавязацельствам, усё адно калі-небудзь ёй прыйдзецца гэта рабіць.

“Факты парушэнняў дзяржавай правоў чалавека трэба збіраць, сістэматызаваць, даводзіць справы да КПЧ і пастаянна нагадваць уладам, што яны парушаюць узятыя на сябе абавязацельствы. Я планую прайсці ўсю неабходную працэдуру. Хай бегае і хаваецца ўлада, а не дэмакратычныя актывісты. Калі будуць пытанні ці заўвагі з боку афіцыйных уладаў Беларусі - я гатовы на іх адказаць”, - пракаментаваў адказ КПЧ Ілля Дабратвор.